Shaıtan qalaı azǵyrady?
Bir jas jigit dáret alaıyn dep bilegin sybanǵany sol eken, shaıtan laǵyneti júgirip kelip, bylaı dep sybyrlaıdy: «Jap-jas bolyp ne kórindi sonsha? Oralyńnyń barynda oınap kúlmeısiń be? Bul dúnıege eki ret kelmeısiń ǵoı. Erteń jasyń kelip, qartaıǵan kezde de qulshylyq jasap úlgeresiń».
Jas jigit munyń bári shaıtannyń sybyry ekenin birden sezdi de: «Ajal eshkimdi jassyń nemese kárisiń dep bólmeıdi ǵoı», - dedi.
Shaıtan endi ekinshi jaqtan keldi: «Alla – Raqymdy, Meıirimdi, Keshirimdi, Rahman, Rahıım emes pe? Onyń ústine qanshama kúnáhar bar. Sonyń bárinen esep alynady deısiń be? Kóppen kórgen uly toı! Jurtpen birge pesheneńe jazǵanyn kóresiń. Qaısybirin ýaıymdaısyń? Búıtip tońqańdap júrgenshe ómirdiń bar rahaty men lázzatyn tatpaısyń ba?»
Osy rette jigittiń oıyna ımam Aǵzamnyń myna sózi orala ketti: «Sen osy qolyndaǵy ýdy iship, dertine shıpa tapqan adam kórip pe ediń? Kúná jasap, artynan Allanyń keshirimin kútý de dál sondaı. Sondaı-aq Alla Quranda barlyq adamnyń esebin alý – bir adamnyń esebin alǵandaı op-ońaı ekenin baıan etken. Sen de bekerge bilgishtene berme!»
Ibilis endi jigittiń júregine basqa bir jol izdeı bastady: «Oılanyp kórshi, ol jaqqa baryp kelgen bireý bar ma? Osynsha eńbek etesiń. Jastyǵyńda qyzyq kórmeı, ólip talyp qulshylyq jasaısyń. Arǵy jaqqa barǵanda, eshteńe bolmaı qalsa ne isteısiń? Bosqa qor bolyp ómirden ótkeniń qalady», – deıdi.
Jigittiń jaýaby daıyn edi: «Aıdalaǵa laǵyp qaıtesiń, laǵyneti! Qalaısha eshkim barǵan joq deısiń. Baryp keldi. Súıikti Paıǵambarymyz baryp keldi. Mıǵraj oqıǵasynda ol jaqta ne baryn óz kózimen kórip keldi. Bizge sony aıtyp berdi. Al men soǵan senetin adammyn. Onyń ústine qulshylyqty bir nárse tabý úshin jasamaımyz. Jalǵyz maqsatymyz – bir Allanyń razylyǵyna qaýyshý. Ǵalamdardyń jalǵyz Iesi Alla razy bolsa, eki dúnıeme sol jetedi», -dedi.
- Paıǵambardyń ol jaqqa barǵan-barmaǵanyn kózińmen kórgen joqsyń ǵoı, – dep shaıtan jigit kóńiline kúdik uıalatqysy keldi. Biraq jigit onysyna da kóne qoımady.
- Biz kún saıyn oqyp júrgen qasıetti Quran kárim – hazret Muhammedtiń (s.ǵ.s.) paıǵambar ekenine anyq dálel. Odan artyq dáleldiń maǵan qajeti joq.
Osyny estigen shaıtan ataqty áýlıe quldarǵa qoldanatyn áıgili ádisine basty: «Áı, jas jigit búginge deıin dál sendeı ǵúlamany kózim kórmepti. Bir sózime senbediń-aý? Ne degen tereń bilimniń ıesi ediń óziń», –dep maqtaı bastady. Jigittiń oıyna kezinde Júneıd ál-Baǵdadıdyń basynan ótken oqıǵa sap ete qaldy. Sóıtti de bylaı dep jaýap qaıyrdy: «Áı, laǵynet atqyr shaıtan! Endi meni maqtap tákapparlyqqa tartqyń kele me? Joq, ol pıǵylyń bola qoımas. Seniń jamandyǵyńnan Allaǵa syıynamyn. Alla kókeıime salmasa, bul sózderdiń birin de saǵan aıta almas edim. Óıtkeni men eshkim emespin. Meni týra jolǵa salǵan bir Allanyń ózi. Maǵan jandy da, tándi de, sóıleıtin tildi de, jol tabatyn bilimdi de bergen jalǵyz Alla ǵana!»
Jas jigit osyny aıtty da, dáretin ala bastady. Shaıtan da óz jónimen kete bardy.
Asylbek Áýezhanuly
