SARAŃDYQ PEN JINAQYLYQ

Birneshe táýir kisiler bir jetim-jesir qalǵan úı ishin jylý jııamyz dep, ár úıge qydyryp baryp júrip, bir baıdyń úıine kelse, baı jumyskerine bir kishkentaı jipti jańbyrda umytyp, dalada qaldyrypsyń dep, qatty urysyp tur eken. Urysyp turyp aıtady:

- Sen bilmeısiń, ol kishkentaı jip te bolsa, malǵa satyp alynǵan nárse, maldyń tabylýy ońaı emes, - dep.

Muny esitip, kórip, álgi jolaýshylar ózdi-ózi sóılesti:

 "Bir jaman jipti dalada umytyp qaldyrdyń dep, sonsha keıip turǵan adam bizge eshnárse bere qoımas, aýzymyzdy aýyrtpaı, kelgen izimizben qaıtalyq".

Ishinde bireýi aıtty:

- Nemiz ketip barady, kelgen soń buǵan da aıtyp ketelik. Bul sózben baıǵa kelip, sálem berdi.

Baı bulardy ádeppen úıine kirgizdi. Sonan soń kelgenderdiń jumysyn esitip, sol jerdiń ózinde bótenderge qaraǵanda eki ese aqsha shyǵaryp berdi jáne munan basqa tórt-bes qap astyq beremin dep ýáde etti. Munysyn kórip, jolaýshylar tańdanyp otyrdy da, ózderiniń dalada baıdy sarańǵa sanaǵandaryn aıtysty. Sonda baı aıtty:

- Az nárseni azsynbaı, qadirin bilip jınaǵannan osyndaı kem-ketikke járdem berýge qolym jetisti, jınaqtylyq - sarańdyqqa jatpaıdy, - dedi deıdi.

Ybyraı ALTYNSARIN

"Tańdamaly shyǵarmalary"  Almaty, 1994 jyl