Salıqaly bala tárbıeleýdiń 7 amaly

Bala boıyna ıslam qundylyqtaryn, sharıǵat zańdaryn, adamgershilik negizderin sińirý mańyzdy. Jáne bul qazirgideı qubylma ýaqytta óte qıyn. Balany qoǵamnyń jaǵymsyz yqpalynan qorǵap, barynsha durys jolǵa baǵyttaý qajet. Tómende balany neǵurlym meıirimdi, qaıyrymdy etip tárbıeleý joldaryn usynamyz:

1. Balańyzǵa esin bilgennen bastap Allaǵa qulshylyq qylýdyń mańyzyn túsindire bastańyz. Sebebi ár ata-ananyń balasyna eń birinshi úıretýi tıis dúnıesi osy bolmaq.

2. Balalarǵa meıirimdi bolyńyz. Meıirim meıirimdilikke jol ashady. Eger siz óz balańyzǵa meıirimdilik tanytsańyz, bala da ózgelerge meıirimdi bolady.

3. Balalaryńyzǵa musylmandar qatarynan shyqqan tarıhı tulǵalardyń úlgisin úıretińiz. Sheteldik zamanaýı ertegi keıipkerleriniń ornyna Alla elshisiniń (s.ǵ.s.), onyń sahabalarynyń (r.a.) ómir jolyn tanystyryńyz. Ǵıbratty áńgimeler arqyly jaqsy men jamandy túsindirińiz.

4. Balalardyń úlkenderdiń janynda otyrýyna ruqsat etińiz. Ásirese úlkenderdiń ýaǵyzyn, salıqaly áńgimelerin balanyń tyńdaǵany abzal.

5. Balaǵa kóp kóńil bólińiz. Sizdiń balańyz úshin jasaıtyn úlken isińiz – olarǵa barynsha kóńil bólý. Solaısha bar men joqty, jaqsy men jamandy, aq pen qarany kúndelikti tirlikte, birge ýaqyt ótkizgen kezderde úıretesiz. Olardy bógde adamdardyń qorshaýynda qaldyrmańyz.

6. Balalaryńyzdy maqtańyz. Ata-ananyń maqtaýy olardy jaqsy isterge jeteleıdi. Biraq maqtaýdyń da ólshemi bar ekenin umytpańyz. Sol sııaqty, ár isiniń durys-burysyn túsindirip otyryńyz.

7. Eń bastysy balalaryńyz úshin árdaıym duǵa qylyńyz. Sizdiń balalaryńyz úshin jasaıtyn duǵańyz olar úshin eń úlken qorǵan. Sondaı-aq olar sizdiń qalaı namaz oqıtynyńyzdy, qalaı zikir etkenińizdi kórip óssin. Sonda olardan taqýa adam ósirý ońaıyraq bolady. Namazdyń qundylyǵy jóninde jıi aıtyńyz. Jasynan namazhan ata-anasyn kórip, olardyń meıirimin sezip, adamgershiligin, qaıyrymdylyǵyn tanyp ósken bala sanaly túrde tárbıe alady.