RAMAZANDAǴY EŃ BAǴALY ÝAQYT

Birinshisi: Kúnniń eń alǵashqy eki saǵaty – tań namazynan keıingi ýaqyt. Paıǵambarymyz (s.ǵ.s): «Kim jamaǵatpen namaz oqyp, sosyn kún shyqqansha duǵa, zikir jasap otyrsa, sodan soń eki rákaǵat namaz oqıtyn bolsa, oǵan qajylyq pen ýmranyń tolyq saýaby beriledi» degen (Tırmızı).

Ekinshisi: Kúnniń sońǵy saǵaty – kún batar aldyndaǵy kezeń. Oraza ustaǵan kóp musylman bul sáttiń qadirin bilmeı jatady. Búkil ýaqyty aýyzasharǵa daıyndalýmen, ne ýaqytty tez ótkizemin dep bos jiberip alady. Bul sizdiń óte baǵaly mınýttaryńyz ben asa qymbat sekýndtaryńyz. Kúni boıy ustaǵan orazańyzdy dáneker qylyp, Alladan qalaǵan nárseńizdi suraı alasyz. Bul duǵańyz qabyl bolatyn eń mańyzdy sát.

Úshinshisi: sáresi ýaqyty – tań atýdyń aldyndaǵy kez. Ol sát Alla Taǵalanyń: «Menen suraýshy bar ma? Men oǵan beremin! Maǵan táýbe etip, kúnásynan qaıtýshy bar ma? Qabyl etemin! Menen keshirim suraýshy bar ma? Men ony keshiremin!» deıtin kezi.

Mine, bul úsh ýaqyt Ramazan aıynda árbir musylman úshin eń baǵaly bolýy tıis. Berekege toly qasıetti aıda Alladan qalaǵanyńyzdy suraýǵa asyǵyńyz! Ramazan – tek tamaqtan ǵana tyıylatyn aı emes, keshirim ýáde etilgen qasıetti, múbárak aı.

Alla nıetterińizdi qabyl etsin!