QUNANBAI QAJYLYQ SAPARǴA ATTANARDA

Qunanbaıdyń qajylyq saparǵa attanar aldynda Uljanǵa aıtqany:

...Báıbishe, úı serigim ǵana emes, ómir serigim ediń. Uzaq keshken tirlikte qaı beldiń astynda júrsem de, artymda otyrǵan bir bel óziń ediń. Ózime taǵdyr baq bergen janmyn deýshi em.

Aıtyspasaq ta, jer tanytyp otyratyn qabaq pen júrek bar edi, soǵan senýshi em de, keıde shálkes, keıde qııa da basyp kete berýshi em. Baǵyma masaıyp erkelegenim bolsa kerek.

Endi qaı dóńniń basynda qalarmyz, kim biledi. Seniń aıtar kináń bolsa da, meniń saǵan artar bir túıirdeı nazym joq. Adal júrek, aq beıiliń úshin balalaryńnyń baǵy ashylsyn.

Men aıtardy óziń aıtypsyń. Meniń armanymdy óz armanyń etipsiń. - dedi

Bul – Mekkege júrer aldyndaǵy Qunanbaıdyń Uljanǵa aıtqan sózi.

Qalyń týys, úıirli aǵaıyn, shoǵyrly bala-shaǵa, dos-jaran, tamyr-tanys, nesheme áıelder ishinen jalǵyz Uljanmen aryzdasty.

Uljannyń nurly bitken aqshyl-qyzǵylt júzi ishin tońazytqan sezimnen kókshil tartyp, qatty ózgerdi. Biraq kópke sheıin úndemeı otyryp, júrek toqtatty:

- Myrza, atalyq armanyńdy aqtar balań bolsyn. Sen úshin de, ózim úshin de tiler bar tilegim osy ǵana! Mynadaı saparyńa kiná túgil, naz ertsem, onym bilmestik bolar edi.

Meni dardaı etip kóterip aıttyń. Biraq men ondaı emespin ǵoı. Ár kezdegi isimdi oılasam, ózimniń de kinám kóp. Jón be, teris pe, bilmeımin, myrza, - dep kúıeýiniń betine salmaqpen qarady."

Qaıran babalarym, erkegi - er, balasy - dana, qyzy - qylyqty, áıelderi - ana, apa bolǵan kúnder-aı...

Klara Bektemirdiń jazbasynan