QARA JERDE NEŃ BAR?

Dáýletqalı degen jer qoryp eldiń túıesin jaıǵyzbaǵan soń, Turlan kelip:

— Túıeni nege qaıyrasyń? — deıdi.

— Túıeńdi qaıyrmaı, munda seniń baqtyryp qoıǵan jeriń bar ma edi? — deıdi Dáýletqalı.

— Atańa nálet, aq súıek! Tóreniń eli degen eldi qaıdan kórdiń, jerdi qaıdan kórdiń? — dep jatyp sabaıdy.

«Tóre tuqymyna til tıgizipti» degen habar Orynbordaǵy Álen hanǵa jetedi. Han qaharlanyp, Turlandy óltirmek bolyp 300 kisimen Asaýdyń aýylyna kelip, Turlandy shaqyrtyp aldyrady.

Turlan kelip:

— Álen, soqyr! Meni nege shaqyrdyń? — deıdi. Sonda han qylyshyn qynabynan sýyryp alyp, tórt sardar bıine qarap:

— Mynanyń tóresin berińder! — depti.

Sardardyń bári jaza kesýge Turlannan, «keshirim» deýge hannan qorqyp Aıtýar sheshenge qarapty.

Sonda Aıtýar sheshen ornynan ushyp turyp:

— Aı, han! Burynǵydan qalǵan sóz joq pa edi, «qara qazaqqa han ıe, qara jerge halyq ıe» degen qaıda? Handyǵyńdy ber de jerdi al, handyǵyńdy qımasań, qara jerde neń bar? — depti.

Sonda halyq qaharynan qaımyqqan han:

— Bas taqsyr! Tóreńe quldyq! — dep otyra ketken eken.

Beısenǵalı Kókeı