QADIR TÚNI BAR YNTAMEN QULShYLYQ ETÝ JAIYNDA

Alla Taǵala adam balasyn Ózine qulshylyq etsin dep jaratqan. Olaı bolsa, Islam ǵulamalary qasıetti Qadir túninde Allaǵa jaqyndatatyn tómendegideı amaldardy jasaǵan abzal degen.

1. Bul túnde Allanyń ryzashylyǵy úshin ǵıbadat jasap, namaz oqyp, quldyq sezimderimizdi arttyrýymyz kerek.
2. Quran Kárim oqylyp, tyńdalyp, túsinýge ynta qoıylyp, Quran Kárimge súıispenshilik pen baılanystar ornatylýy tıis.
3. Paıǵambarymyz (Allanyń Oǵan salaýaty men sálemi bolsyn) salaýat aıtyp, onyń shapaǵat etýinen úmittenip, onyń úmmetinen bolǵanymyzdy sanaly túrde sezinip, onyń jolyn berik ustanýymyz shart.
4. Ýaǵyz-nasıhat tyńdap, suhbattar quryp, kúndelikti kúıbeń  tirshilik barysynda júrekke túsken kirbińdi jýyp-shaıyp, kóńilge uıalaǵan kir men kúmánnan arylýyǵa tıistimiz.
5. Qadir keshiniń mańyzyna baılanysty jáne Qadir túnine qatysty jetkilikti maǵlumat beretin din adamdarymen suhbat qurý  kerek. Ásirese, adam óz-ózimen suhbattasyp, qatelikterin tanyp, kemshilikterin joıýǵa kúsh salýǵa, adamdarmen dostyq qarym-qatynasyn kúsheıtýge, birlik pen birtutastyqty arttyrýǵa mán berýi tıis.
6. Táýbe men ıstıǵfar jasap, óz nápsisin esepten ótkizip, qatelik jasaýdan saqtanyp, qaıyrly isterdi jasaýǵa qushtar bolýy shart.
7. Allany zikir etip, Uly Jaratýshynyń sheksiz qudiretimen joqtan bar bolǵan jaratylystyń syrlaryna oı júgirtip, Allany eske alýmen júrekke tynyshtyq uıalatýǵa barynsha áreket jasap, ımanymyzdy kúsheıtýimiz qajet.
8. Jıi-jıi duǵa jasaýymyz kerek. Óıtkeni, duǵa adamdy Uly Jartýshyǵa jaqyndatatyn dáneker desek bolady.
9. Qadir túniniń kúndizin de beıne kesh sekildi ótkizý lázim. Osylaı bolǵan bolsa, múbárak túnniń rýhtarǵa tókken shuǵylasy sińimdi bolyp, júrektiń qaq tórinen oryn alary sózsiz.
10. Bul Qadir túniniń qurmetine Rabbymyzdan búkil musylmandardyń kúnálarynyń keshirilýin tileýimiz kerek. Qadir túniniń jaqsylyqqa muryndyq bolýyn, dostyq pen baýyrmashyldyqty arttyryp, Islam áleminiń birtutastyǵyn jáne kúlli adamzatty apattardan saqta dep tileýimiz shart.

Allanyń Elshisi (Allanyń Oǵan salaýaty men sálemi bolsyn) bylaı dedi: «Kim Qadir túnin Allanyń saýabyna ıman keltirgen jáne úmit etken kúıde namaz oqyp ótkizse, onyń aldyńǵy kúnálary keshiriledi»[10].

Aısha (r.a.) Paıǵambarymyzdan (Allanyń Oǵan salaýaty men sálemi bolsyn) bylaı dep suraǵany baıandalady: «Ýa, Allanyń elshisi, eger men Qadir túniniń bastalǵany týraly bilsem, ne aıtýym kerek?» Ol: «Ýa, Alla, rasynda, Sen –Keshirimdisiń, keshirýdi jaqsy kóresiń. Meni keshire gór!», – dep aıt»[11], – dedi.

Osy hadısterdi atap bolǵan soń, hafız Ibn Rajab bylaı dedi: «Sýfıan ás-Saýrı: «Qadir túni duǵa etý men úshin namaz oqýdan da súıiktirek», – deıtin. Sýfıan ás-Sáýrıdiń aıtpaqshy bolǵany: kóp duǵa etý, duǵasy jıi aıtylmaıtyn namazdan artyq. Alaıda eger adam namazdan keıin Quran oqyp, duǵa jasaıtyn bolsa, onda árıne, bul jaqsyraq. Ramazan aıynda Paıǵambar (Allanyń Oǵan salaýaty men sálemi bolsyn) túngi namazdardy oqyǵanda, Qurandy mánerlep oqyp, Allanyń meıirimi men keshirimi týraly aıattaryna jetken ýaqytta, Alladan meıirimdilik pen maǵfırat jasaýyn tileıtin, al azap týraly aıattardy oqysa, Jaratýshy Ieden pana suraıtyn. Osylaısha Alla Elshisi (Allanyń Oǵan salaýaty men sálemi bolsyn) namaz ben Qurandy, duǵa men zikirdi biriktire otyryp jasaǵan! Bul Ramazan aıynyń sońǵy on túninde jáne basqa túnderi jasalatyn eń jaqsy ári eń kemel is bolyp tabylady[12].

[10] Ál-Býharı 38, Mýslım 760
[11] Át-Tırmızı, Ibn Májah, ál-Hakım. Imam Ábý `Isa át-Tırmızı, ál-Hakım hadısti sahıh degen. «Sahıh ál-jámı’» 4423
[12] «Látaıfýl-má’arıf» 204.