Perishtelerdiń ózi salaýat aıtqanda, biz nege sarańdyq jasaımyz?!
Naýryzbaı qajy Taǵanuly
QMDB tóraǵasynyń birinshi orynbasary, naıb múftı,
Astana qalasynyń jáne respýblıkalyq
«Áziret Sultan» meshitiniń Bas ımamy
Musylman úmmetiniń qýana qarsy alar merekesi – Máýlit aıy meıramyna Alla násip etip bıyl taǵy qaýyshtyq.
Bul mereke, ıaǵnı Paıǵambarymyzdyń (s.ǵ.s) dúnıege kelýi – musylmandar úshin ulanasyr meıram, qýanyshty oqıǵa. Iıa, óte úlken mereke. Basqasha bolýy da múmkin emes. Sebebi dál osy Máýlit aıynda Alla Taǵala adamzatqa eń uly nyǵmetin (s.ǵ.s) jiberdi. Bul nyǵmetti adamzat úshin meıirim etti. Alla Taǵala Quranda:
وَمَا أَرْسَلْنَاكَ إِلاّ رَحْمَةً لِّلْعَالَمِينَ
«Biz seni búkil álemge rahmet etip qana jiberdik»[1], – dep baıandady bul nyǵmetin.
Sonymen qatar, Paıǵambar (s.ǵ.s) izinen ergen úmmeti ózge úmmetterdiń aldynda úlken abyroıǵa bólenip, qaıyrly úmmet atandy. Alla Taǵala bul nyǵmetti Quranda:
كُنْتُمْ خَيْرَ أمّة أُخْرِجَتْ للنْاسِ
«Sender adam balasy úshin qaıyrly bir úmmet bolyp tańdaldyńdar»,[2] – dep kórsetken. Úmmet bul abyroıǵa Paıǵambarsyz (s.ǵ.s) áste qol jetkize almas-ty. Bul aqıqatty Alla Taǵala Quranda:
لَقَدْ مَنَّ اللهُ عَلىْ المُؤْمِنيْنَ إذْ بَعَثَ فِيِهِمْ رَسُولاً مِنْهُمْ يَتْلوُ عَلَيْهِمْ آيْاتِهِ وَيُزَكّيهِمْ
«Rasynda, Alla múminderge qamqorlyq etip, olardyń ishine ózderinen, olarǵa Alla aıatyn oqıtyn, olardy tazartatyn Elshi jiberdi»[3], – dep baıandaǵan.
Sonymen qatar, Paıǵambardyń (s.ǵ.s) bar bolýy – úmmetiniń azapqa ushyramaýyna kepil. Alla Taǵala bul týraly Quranda:
وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ
«Negizinde, Alla Sen olardyń ishinde bolǵanda, olardy azaptamaıdy»[4], – deıdi.
Mine, osylaısha Paıǵambardyń (s.ǵ.s) ómirge kelýimen jer men kóktiń arasy nurǵa bólenip, paıǵambarlyqtyń kelýimen tórtkúl dúnıe týra joldyń nuryna shomdy.
Onyń (s.ǵ.s) dúnıege kelýi Kısranyń taǵyn shaıqap, májýsılerdiń myń jyl óshpegen ottaryn sóndirdi.
Paıǵambardyń (s.ǵ.s) ómirge kelýine qýanbaý múmkin be?! Ol (s.ǵ.s) – adamzattyń myrzasy. Onyń (s.ǵ.s) súnnetine erý – Allaǵa degen mahabbattyń kórinisi. Alla Taǵala bul týraly bylaı súıinshileıdi:
قُلْ إنْ كُنْتُمْ تُحِبّوُنَ اللهَ فاتبعوني يُحْبِبْكُمْ اللهُ وَيَغْفِرْ لَكُمْ
«(Muhammed s.ǵ.s.) olarǵa: «Eger Allany súıseńder, onda maǵan ilesińder. Alla (T.) senderdi jaqsy kórip, kúnálaryńdy jarylqaıdy», – de».[5]
Muhammad (s.ǵ.s) – uly paıǵambar. Oǵan baǵyný – Allaǵa baǵyný. Alla Taǵala aıtady:
مَنْ يُطِعِ الرَسُوُلَ فَقَدْ أَطاعَ اَللهْ
«Kim paıǵambarǵa baǵynsa, rasynda Allaǵa baǵynǵan bolady»[6].
Paıǵambardy (s.ǵ.s) jaqsy kórmegen adamnyń ımany kámil bola almaıdy. Buǵan qatysty sahıh hadıste Paıǵambarymyz (s.ǵ.s):
لا يُؤْمِنُ أحَدُكُمْ حَتّىّ أكوُنَ أحَبُّ إليْهِ مِنْ وَلَدِهِ وَوَالِدهِ وَالناسِ أَجْمَعيْن
«Kimde-kim meni balasynan, ákesinen jáne jalpy adamdardyń bárinen artyq jaqsy kórmeıinshe, tolyq ıman etken bolmaıdy»[7], – deıdi.
Mine, bul – Muhammed (s.ǵ.s)! Onyń (s.ǵ.s) ómirge kelýi búkil álemdi nurǵa bólegen. Onyń dúnıege kelýi – úmmet úshin úlken qýanysh. Alla Taǵala Paıǵambarymyzdyń (s.ǵ.s) ornyn Quranda myna aıatpen kórsetedi:
إنَّ اللهَ وَمَلائِكتَهُ يُصَلّوُنَ عَلىْ النَبِيّ
«Rasynda, Alla Paıǵambarǵa rahmet etedi. Jáne perishteler salaýat aıtady»[8]. Endeshe, paıǵambarymyzdyń (s.ǵ.s) qurmetine biz de salaýat aıtaıyq, sebebi Alla Taǵala bizge:
يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا
«Áı, múminder! Oǵan salaýat jáne yqylaspen sálem keltirińder»[9], – dep buıyrǵan.
Sondaı-aq, Alla Elshisi (s.ǵ.s.) óziniń bir hadısinde:
البخيل من ذكرت عنده فلم يصل عليَّ
«Sarań adam – meniń atym atylǵanda, maǵan salaýat aıtpaǵan adam»,[10] – degen eken. Endeshe, kúlli ǵalam raqym nuryna shomylyp, perishtelerdiń ózi salaýat joldap jatqanda, mereıli Máýlit aıtynda biz de súıikti Paıǵambarymyzǵa (s.ǵ.s.) salaýat aıtyp, «sarańdardyń» qatarynan bolýdan saqtanaıyq!
Allahýmma sallı ýa sallım ala saııdına Mýhammadın ýa ala alıhı ýa ashabıhı ýa mán tabıahým bı ıhsanın ılá ıaýmıd-dın.
Ýa, Alla! Myrzamyz Muhammedke, onyń otbasyna, sahabalaryna jáne qııametke deıingi sońynan ergenderge sálemiń men ıgiligińdi jaýdyrǵaısyń!
