Perishteler jýyndyrǵan sahaba týraly bilesiz be?
Asyl dinimizdiń tarıhı qatparynda jatqan ǵajaıypqa toly jaıttar az emes. Solardyń biri – «Ǵasılýl-málaıka», ıaǵnı perishteler jýyndyrǵan sahaba týraly oqıǵa.
Paıǵambarymyz Muhammed (s.ǵ.s.) Medınaǵa hıjret etip kelgende, Hanzala ıbn Ábý Omar ıbn Safı ál-Ansarı óz qaýymymen birge Islamdy qabyldaǵan. Al, jubaıy Jámılá munafıqterdiń kóshbasshysy Abdýlla ıbn Ýbaı ıbn Salýldyń qyzy bolǵanymen, ımanyna berik áıel edi. Hanzala (r.a.) jas bolsa da óte taqýa, jaýjúrek bolatyn. Al, onyń ákesi Ábý Omar Paıǵambarymyzǵa (s.ǵ.s.) ıman keltirmeı ómirden ótken. Negizi Ábý Omar Islam dini kelmeı turyp áhlı kitap ǵalymdarynan ilim alǵan. Ol da aqyrzaman paıǵambarynyń keletinin aıtyp júretin. Óz dáýirinde ony Ábý Omar Rahıb dep ataǵan.
Paıǵambarymyz (s.ǵ.s.) Medınaǵa hıjret etip kelgen kezinde Ábý Omar Alla Elshisine qarata: «Alla jalǵan sóılegen adamdy jalǵyz qaldyryp, sýǵa batyrsyn!», – dep qarǵaıdy. Paıǵambarymyz (s.ǵ.s.): «Ámın!» – deıdi. Sonda Ábý Omar: «Qaısybir qaýym saǵan qarsy shyqsa, men de solarmen qosylyp senimen soǵysamyn!», – deıdi. Alla Elshisi (s.ǵ.s.) ony «Ábý Omar Fasıq», dedi. Sol kúnnen bastap ol solaı atalyp ketti. Ábý Omar Mekkelik múshrikterge qosylyp, musylmandarǵa qarsy Uhyd soǵysyna qatysty. Al, Mekke alynǵan kezde qashyp ketip, bóten elde sýǵa batyp ólgen eken.
Hanzala (r.a.) ákesiniń bul is-áreketi úshin qatty qaıǵyrǵan. Týra osy muń-qasiret óziniń qaıynaǵasy Abdýlla da da bar edi. Sebebi, joǵaryda aıtyp ótkenimizdeı onyń ákesi Abdýlla ıbn Ýbaı Paıǵambarymyzǵa (ﷺ) tek syrttaı ıman keltirgen ekijúzdi munafıqterdiń qatarynan edi.
Hanzala (r.a.) Uhyd soǵysynda Islam dini úshin janyn pıda etti. Sonda Alla Elshisi (s.ǵ.s.) bir ǵajaıyp oqıǵanyń kýási bolady. Artynsha Hanzalanyń jesiri Jámılá jubaıy úshin qaıǵyryp ári yńǵaısyzdana: «Ýhýdqa shaqyrylǵanda, ol kisi júnip kúıde bolatyn. Keshigip qalmas úshin ǵusyl quıynbaı shyǵyp ketip edi», – dep aıtady. Muny Paıǵambarymyz (s.ǵ.s.) estigende: «Sen Hanzalany ýaıymdama! Men ony kúmis ydysta jańbyr sýymen jýyndyryp jatqan perishtelerdi kórdim», – deıdi.
Alla Taǵala uly sahabalarymyzdy raqymyna bólesin!
