Pendeniń kemshilikpen jaratylýynda – Allanyń hıkmeti bar
Adam balasy — álsiz jaratylys. Jaratylýynda umytshaqtyq, shúkirsizdik, qatelesý sııaqty tabıǵı qasıetter bar. Bul — kemshilik emes, bul — synaq. Al adamdy adam etetin — sol álsizdikterge qaramastan, jaqsylyqty tańdaı bilýi.
Paıǵambarymyz Muhammed (sallallahý aleıhı ýá sállám) bylaı deıdi:
«Alla Taǵala Adamdy jánnatta beınelep jaratqan kezde, ony birshama ýaqytqa sol kúıinde qaldyrdy. Ibilis onyń aınalasyn aınalyp júrip, qandaı jaratylys ekenin baqylap qarady. Ol onyń ishi qýys ekenin kórip, mundaı jaratylys óz-ózin ustaı almaıtyn (álsiz) bolatynyn túsindi».
— (Múslim rıýaıat etken hadıs)
Bul hadıs adam balasynyń tabıǵı álsizdigin meńzeıdi. Ibilis sol álsizdikke qarap, menmendikke salynyp, Adamǵa sájde etýden bas tartty. Biraq Alla Taǵala adamnyń álsizdigin jaratylystaǵy kemshilik emes, nyǵmet pen múmkindik retinde qarastyrdy. Sebebi álsizdik — tákapparlyqqa emes, táýbege bastaıdy. Álsizdik — adamdy Rabbysyna qaıtarady. .
Kemshilikti jasyrý — ımannyń belgisi
Islam bizge bireýdiń kemshiligin termeı, jaqsy qasıetterine nazar aýdarýdy buıyrady. Bul týraly Paıǵambarymyz:
«Kimde-kim bir musylmannyń kemshiligin jasyrsa, Alla onyń qııamettegi kemshiligin jasyrady» — degen.
Iaǵnı, adamnyń syrtqy álsizdikterinen buryn, júrektegi shynaıy nıetke nazar aýdarý kerek. Sebebi eshbir pende minsiz emes. Al kemshiligin jasyra biletin jan – kórkem minezdi adam.
Adam – shúkirsiz, biraq Alla – Kórýshi
Alla Taǵala Quranda bylaı deıdi:
«Aqıqatynda, adam balasy Rabbysyna tym shúkirsiz jaratylys.»
— (Adıııat súresi, 6-aıat)
Iá, biz kóp jaǵdaıda ózimizge jasalǵan jaqsylyqty umytamyz. Ásirese eleýsiz, kóleńkede qalǵan adamdardyń eńbegin baıqamaımyz. Biraq Rabbymyz eshteńeni umytpaıdy.
«Jer men kóktiń bir túıir tozańy da Rabbyńnan jasyryn qalmaıdy...»
— (Iýnýs súresi, 61-aıat)
Alla árbir jasyryn oıdy, árbir únsiz jaqsylyǵymyzdy kóredi. Sondyqtan adam balasy jasaǵan ıgi isterine adamdardan alǵys kútpeýi kerek. Ol jaqsylyq — Alla úshin bolýy kerek.
Jaqsylyq kim úshin?
Eger jaqsy adam bolǵyń kelse — jaqsy jar, jaqsy ata-ana, jaqsy dos, jaqsy kórshi, jaqsy musylman — bárin Alla razylyǵy úshin iste. Sonda eshqashan renjimeısiń, eshqashan úmitiń úzilmeıdi.
Keıde bar jan-tánińmen jasaǵan jaqsylyq eskerýsiz qalýy múmkin. Tipti bireýdiń renishine de ushyraýyń múmkin. Ondaı sátte júregińde tek mynadaı oı bolsyn:
«Men istegenimdi Alla kórip tur... Alla maǵan jetkilikti!»
Ersaıyn SÁKENOV, «Áziret Sultan» meshitniń ustazy
