Paıǵambarymyzǵa (s.ǵ.s.) sıqyr jasalǵan ba?

Áhli-súnnet ǵulamalarynyń kózqarasy boıynsha, sıqyr ómirde bar nárse. Ol fızıkalyq dúnıege de áser ete alady, biraq bul áser sıqyrshynyń emes, Allanyń qudiretimen júzege asatyn is. Al, sıqyrshynyń áreketi sebepshi ǵana.

Buharı men Múslim jetkizgen hadısterde Haq rasýlyna (s.ǵ.s.) sıqyr jasalǵandyǵy aıtylady. Az ǵana áser etip, tez arada saýyǵyp ketkendikten, sahabalar bul oqıǵany jasyryp qalmaǵan. Onyń ózi tek Paıǵambarymyzdyń (s.ǵ.s.) jeke basyna ǵana qatysty ekenin, dinge eshqandaı da kesiri tımegenin aıtqan.

Sıqyr jasalǵannan keıin Alla rasýly (s.ǵ.s.) keı namazynda óz dárejesinde sál-pál jańylysqan, biraq bul kópke sozylmaǵan. Atalmysh jańylysýlar aqyrettik oılar men daǵýatqa degen yntyzarlyqtan adamnyń uly sezimge bólenýi, ýaqyt pen keńistikti umytýdan týyndaǵan.

Paıǵambarymyz (s.ǵ.s.) ózine sıqyr jasalǵanyn bilgen bette duǵa oqyp, Alla Taǵaladan shıpa suraǵan. Kóp keshikpeı Jábireıil (ǵ.s.) men Mıkaıyl (ǵ.s.) kelip ne isteý kerek ekenin kórsetedi. Alla rasýlynyń (s.ǵ.s.) shashy men saqalyn, sondaı-aq qurma gúlin qoldanyp sıqyr jasaǵan Lábıt ıbn Asam artynsha túıinshekti Zárýan qudyǵyna tastaǵan eken. Janyna birneshe sahabasyn ertip baryp, qudyqtyń aýzyn japtyryp tastaıdy. Haziret Aısha anamyz (r.a.) «Sıqyrdy aldyń ba?» – dep suraǵanda, Paıǵambarymyz (s.ǵ.s.): «Joq, almadym. Ony alyp shyqsam, el arasynda sıqyr jaıylyp kete me dep qoryqtym», – dep jaýap qaıtardy. Shıpany Allanyń ózi beretinin, sıqyrdan qutylý úshin mindetti túrde sıqyrlanǵan zatty alyp shyǵýdyń kerek emestigin aıtqan. Osy oqıǵaǵa qatysty «Fálaq» jáne «Nas» súreleri túsken.

Nurlan Saılaýuly