OI MARJANDARY
Bir eldiń baqytty, baqytsyzdyǵy – bilimdi urpaǵynyń bolý, bolmaýynda.
***
Jaman dosyń bolǵansha, jaqsy kitabyń bolsyn.
***
Adam – senimimen bıik, pendeligimen alasa.
***
Úmitiń úlken bolsa, úreıiń kishi bolady,
Júregiń kúdikshil bolsa, júrisiń mandymaıdy.
***
Serke senimsiz bolsa qoı adasqaq,
Júrek taza bolmasa oı adasqaq.
***
Kúle sálem bergenniń bári dos emes,
Kúńirene syn aıtqannyń bári jaý emes.
***
Ózgege paıda tıgizý qolyńnan kelmese de, zııandy is isteı kórme.
***
Bıik bolsań, alasaǵa keshirimmen qara,
Alasa bolsań, bıikke qurmet ete bil.
***
Adaldyq arymaıdy, aramdyq jarymaıdy.
***
Bilimdi adamnan saıtanda qorqady.
***
Tar jerde tapqan aqyl, keń jerdegi kemeldi oıdan artyq.
***
Saıasat ózgeredi, zań da ózgeredi,
Alaıda adamnyń adamdyǵy máńgi ózgermeýi tıis.
***
Zamannyń quly bolma, zańǵar elińniń uly bol.
***
Ózin halqyna arnap, el úshin adal eńbek etken jandy erte me, kesh pe halqy da ardaqtaıtyn bolady.
***
Ózge tildi qansha kóp bilseń, sonsha jaqsy,
Óz tilińdi qansha bilmeseń, sonsha qasiret.
***
Aldyńa as kelgende qanaǵatty umytpa,
Basyńa baq qonǵanda jamaǵatty umytpa.
***
Kókiregińe danalyqtyń uryǵyn sepseń, jemisin urpaǵyń jeıdi.
***
Az aqshany aıalap ustasań, kópke jetedi,
Kóp aqshany shashyp ustasań, azǵa da jetpeıdi.
***
Qys qarsyz bolsa, jazdaǵy eginińdi oıla,
Jaz jaýynsyz bolsa, qystaǵy shóbińdi oıla.
***
Eńbekke júgirgen jannyń enshisin Alla beredi.
***
Ózim qýanamyn deseń, ózgeni qýandyra bil.
***
Batyldyq pen senim – jeńistiń baspaldaǵy.
***
Aqyldy adam ajal aýzynda da aqyldy.
***
Jaýyńdy tez jerleýdi oılama, onyń dosyńa aınalýyn oıla.
***
Baqytsyzdyqtyń bastaýy – aqıqatty moıyndamaýdan bastalady.
***
Adal teriń kóp tógilse, alal asyń kóp bolady.
***
Nan jegende eginshini eske al,
Et jegende malshyny eske al.
***
Búgin ólerdeı toıyp, erteńinde ash júretin adam – adamnan kóri haıýanǵa kóbirek uqsaıdy.
***
Eńbekti emshek etken bala ýyzǵa jaryp ósedi.
***
Ashý – aqyldyń tonaýshysy,
Aqyl – adamdyqtyń qorǵaýshysy.
***
Uıat – ımannyń uıasy.
***
Jastyń janyna, káriniń aqylyna úıir bol.
***
Óz ultyn súımegen adamnan otanshyldyq shyqpaıdy.
***
Uıaty kúshti adam urlyqtan aýlaq bolady,
Namysy kúshti adam quldyqtan aýlaq bolady.
***
Izgilik úshin sharshaǵannyń uıqysy tynysh bolady,
Baılyq úshin sharshaǵannyń basy daýsyz bolmaıdy.
***
Búgin úshin bir oılasań, erteń úshin eki oıla.
***
Tańnyń sulý dıdarynda táńirdiń jylýy bar.
***
Meshitke jaqyn otyrǵannyń ımany kóbeıedi,
Dúkenge jaqyn otyrǵannyń tıyny azaıady.
***
Qarttyń kóńilin aýyrtpa, baratyn jeri jaqyn,
Kórshiniń kóńilin aýyrtpa, qonatyn jeri jaqyn.
***
Tabanyńda búr bolsa, taqııańda gúl bolady.
***
Usaqshyl bolsań utylasyń,
Keń peıil bolsań qutylasyń.
***
Keristi terseń, keseliń kóbeıedi,
Urysqaq bolsań uıatyń azaıady.
***
Suraqty jaratqan Alla sheshýin de jaratqan.
***
Dosty baılyǵyna qarap emes, adal júregine qarap tańda.
***
Serigiń senimdi bolsa, ókinishiń az bolady.
***
Appaq jumyrtqadan qap-qara balapan týady,
Danadan da aqymaq bala týady.
***
Ózgelerge or qazý týraly oılaǵannan góri, óziń shyǵatyn jotany izde.
***
Balańdy patshalyqqa úıretseń qul bolmaıdy.
***
Ashy terdiń jemisi tátti bolady,
Artyq uıqynyń azaby ashy bolady.
***
Ómirdi ózińdeı súı,
Ózińdi ómirdeı súı.
***
Júreginde shyndyq shyryldap jatpaǵannan shyńǵa shyǵar talant shyqpaıdy.
***
Aǵaıyn eken dep aranyńdy asha berme,
Qaıyrshy eken dep qazanyńdy tóńkere berme.
***
Senimi joq adam selge aqqan salyndy.
***
Ómir – tátti, ólim – ashy.
***
Jaýyńnyń aldynda shalqaıa bilseń de erlik,
Dosyńnyń aldynda eńkeıe bilseń de erlik.
***
Sóz aýzyńnan shyqqansha ǵana seniki, al aýzyńnan shyqqan soń oǵan ıe bola almaı qalasyń.
***
Jylmańdaǵan túlki aldap tynǵysy keledi,
Jymyrańdaǵan jolbarys jalmap tynǵysy keledi.
***
Jamandy jeńdim dep ózińdi danyshpan sanama,
Baıtaldan ozdy dep atyńdy tulpar sanama.
***
Bilimsiz, aqylsyz, nadan adamdarmen dos bolǵanyń – tesik qaıyqqa otyryp alys saparǵa shyqqanyń.
***
Aýyr eńbektiń azaby umytylady, jemisi qalady,
Qandy urystyń qazasy umytylady, jeńisi qalady.
***
Mahabattyń ystyǵyna bólengen adam ómirdiń sýyǵyna tońbaıdy.
***
Ótiriktiń ólimi jaqyn,
Shyndyqtyń shyńy bıik.
***
Zańyna qurmet etpegen eldiń zalymy kóbeıedi,
Ulylaryn ulyqtaǵan eldiń ǵalymy kóbeıedi.
***
Imandy jannyń erligi eńseli, bilgeni bilikti bolady.
***
Mektepte ustazyń, meshitte ımamyń bilimsiz bolsa qudaıdyń urǵany.
***
Aqyldy ul ata tegin suraǵysh keledi,
Aqylsyz ul kórshiniń balasynda ketken kegin suraǵysh keledi.
***
Jer beti – kúlli adamzattyń ortaq otany.
***
Kesir sózdi adamǵa kedeıshilik pen kesapat úıir.
***
Kóziniń aldyn ǵana oılaıtyn adamnyń kóri jaqyn bolady,
Kóptiń qamyn oılaıtyn adamnyń tóri jaqyn bolady.
***
Ózi týraly aıtylǵan ǵaıbatty estigende sabyr saqtap, jelp etpeý – er jigittiń sabazdyǵy.
***
Taý qansha bıik bolǵanmen aspannyń astynda,
Ózen qansha asaý bolǵanmen jerdiń betinde.
***
Qalamyńnyń jorǵa bolǵany – qara arǵymaǵyńnyń jorǵa bolǵany.
***
Orynsyz qyzǵanysh – etegińe ilingen ot, der kezinde óshirip tastamasań órtenip ketesiń.
***
Qarǵanyp sóılegenniń qaryǵy ashylmaıdy.
***
Kóńiliń kóktem bolsa, ómiriń jaz bolady,
Aıdynyń ashyq bolsa aqqý men qaz qonady.
***
Satqyndyq – seni ýaqyttyq páleden qutqarǵanymen, ýaqyttyń jazasynan qutqara almaıdy.
***
Armanyń bıik bolmaıynsha adymyń ashylmaıdy,
Aryń taza bolmaıynsha qaryǵyń ashylmaıdy.
Jádı Shákenulynyń
«Armanshyl bala» kitabynan
