Orazanyń qadirin túsinip, saýabyn bilsek...
Jaqyp (a.s.) paıǵambardyń on eki balasy bar edi. Júsip degen balasy joǵalyp ketken kezde: «Aı, baıǵus balam-aı», - dep jylap-jylap, kózi soqyr bop qalady. Aldynda on bir balasy qyzmetin jasap, kóńiline qarap, ushyp-talyp júrse de Júsiptiń ornyn toltyra almaıdy. Kóp jyldardan soń on ekinshi balasy Júsip tabylyp, qasyna jaqyndap, kóılegin ákesine berdi. Teri sińgen kóılekti ákesi kózine súrtip edi, jaryq álemdi qaıta kóre bastady. Bul da bolsa Júsip paıǵambardyń ózine tán paıǵambarlyq qasıetiniń arqasynda. Biz muny nege aıtyp otyrmyz?! Óıtkeni adam balasynyń júregi on bir aı boıy soqyr bolady, kóńildiń kózi lastanady. Al «Ramazan» aıy bolsa Júsip paıǵambardyń kóılegi ispetti. Kelse boldy kóńil kózimiz ashylyp, júregimiz nurǵa tola bastaıdy. Mine, sondaı uly bul aı!
Bul aıdyń ulylyǵy jaıly Quran jáne hadıste óte kóp aıtylǵan. Tipti bul aıdy Paıǵambarymyz (s.ǵ.s.) bastaǵan sahabalar (r.a.) asa bir yntyzarlyqpen kútetin bolǵan. Bul aı esik qaǵyp kirip kelgen kezde Paıǵambarymyzdyń (s.ǵ.s.) bylaı aıtqany bar: «Sizderge Ramazan aıy keldi, berekeli aı keldi! Alla Taǵala bul aıdyń orazasyn (oraza tutýdy) sizderge paryz etken. Bul aıda jánnat esikteri ashylady, tozaq esikteri jabylady jáne shaıtandar kisendeledi. Bul aıda (sondaı) bir tún bar, (ol túnde jasalynǵan qulshylyq) myń aıdan (jasalynatyn qulshylyqtardan) jaqsyraq. Kimde-kim bul aıdyń jaqsylyǵynan qur qalsa, (barsha jaqsylyqtardan) qur qalady»[1]. Paıǵambarymyzdyń (s.ǵ.s.) ózi berekeli, qasıetti aı degen bolsa, onyń bereketinen qur qalý bizdeı úmbetterge jarasa ma? Tozaq esikteri jabylyp, jánnat esikteri ashylyp, bizderge osy aıda qulshylyq jasaý arqyly jánnatqa kirińder dep shaqyryp tursa, qalaısha bas tartamyz. Ne bolmasa bizdi azǵyryp júrgen shaıtandardyń barlyǵy kisendelip, olar bizdi azǵyrarǵa kúsh taba almaı jatqan ýaqytta bir tún úsh ne tórt saǵat kóz ilmesten qulshylyq etsek, sol arqyly ózgelerdiń myń aı 83 jyl jasaıtyn qulshylyǵynan da molyraq saýapqa kenelip jatsaq, odan asqan baqyt, bereke, qasıettilik, artyqshylyq bola ma? Endi aıtyńyzshy, osy jaqsylyqtardan qur qalǵan jan búkil jaqsylyqtan qur qalǵan bolmaı ma?
Eger sizge bir jaqsylyq jasaǵanyńyz úshin bir aýdan ákimi: «Seniń syıyńdy, ózim deremin» dese, qansha somadaǵy qarjyny, ne syılyqty kóz aldyńyzǵa elestetesiz? Al eger ýáde berýshi obylys ákimi bolsa she? Ne bolmasa prımer mınstr bolsyn? Qansha somany elesteter edińiz, ne qandaı syı kútetin edińiz? Al, memleket basshysy: «Saǵan syıyńdy ózim beremin», - dese ol kezde ne elestetesiz? Aıtpaǵym ár adamnyń óziniń laýazymyna qarap, onyń syılaý deńgeıi de joǵarylaı beretini aıdan anyq qoı! Endi kóz aldyńyzǵa elestetińiz, Aspandar men Jerdi, eń kishi juldyz bolǵan Kúndi, sol Kúnnen birneshe ese úlken eki júz elý mıllıardtan asa juldyzdardy jaratqan, solardyń barlyǵyn ıgerip turýshy Alla Taǵala: «Eı, pendem, saǵan syıyńdy ózim beremin», - dese ne túsinesiz? Qalaı syılaýy múmkin? Ne syı berýi múmkin? Iá, Alla Taǵala hadıs qudsıde aıtady (Hadıs eki túrli bolady: biri hadıs nábaýı: ol sózi de lebizi de Paıǵambardiki, ekinshisi: hadıs qudsı, onyń lebizi Paıǵambardiki bolsa da, sózi Alla Taǵalanyki): «Pendeniń bar amaly ózi úshin, tek oraza olaı emes. Óıtkeni ol men úshin oraza ustady. Men oǵan (oraza tutqan janǵa) syıyn ózim beremin»[2]. Ýa, álemderdiń Rabbysynyń syıyna laıyqty jandar! Endeshe asyǵyńyzdar!
Qııamet kúni sondaı aýyr kún! Ol kúnde adamdardyń barlyǵy mas bolyp júrgenin kóresiz. Ol adamdar spırtti ishimdikke toıyp alǵan mastar emes, bálkim Alla Taǵalanyń azabyn óz kózderimen kórgen sátterinde tentirep, esteri kirdi-shyqty bolyp qalǵan jandar. Ol kúnde Paıǵambarlardyń ózderi meniń jaǵdaıym ne bolar eken dep, óziniń kúıin kúıttep otyratyn kún. Ol kúnde áke balasynan, bala ákesinen qashatyn kún. Ol kúnde bir saýap úshin jaǵa jyrtysatyn, aýyzdar mórlenip, qol jáne aıaqtar istegen kúnálardyń habaryn beretin kún. Ol kúnniń qorqynyshyn sıpattarǵa til álsiz, sózimiz jetpeıdi! Mine, sol kúnde bar kúnádan aıyqqan hálde, jaryq júzben turǵyńyz keledi me? Endeshe Paıǵambarymyzdyń (s.ǵ.s.) myna hadısine qulaq túrińiz: «Kimde-kim Ramazan aıynda (Alla Taǵalanyń sózderine) ıman keltirgen, (jáne saýaptarynan) úmit etken hálde oraza tutatyn bolsa, onyń sol ýaqytqa deıingi bar kúnási keshiriledi»[3] - degen. Al biz kúnálarymyzdyń keshirilýine az ǵana qulshynyp, oraza ustaıtyn bolsaq, bizderdiń Alla Taǵala buryn ótken bar kúnámizdi jarylqaýǵa ýáde etip jatyr. Bile bilgen, kózi ashyq-kókiregi oıaý janǵa uly syı! Uly jetistik! Áıtse de bul aıdyń qadirin bilmesten, orazasyn tutpastan, Alladan uıalmastan kúni boıy iship-jeýden tyıylmaıtyndar bar. Paıǵambarymyz bylaı deıdi: «Jábireıil perishte kelip: «Kimde-kim Ramazan aıyna kire tura, kúnálary keshirilmese, murny jerge súrinsin, - dedi. Men: «Ámın», - dedim». Sondyqtan, Ramazandy beıqam ótkizip, murny jergen súringenderden bolyp qalmaıyq.+
Mine, kórdińiz be? Biz qashan Ramazan orazasyn tutady ekenbiz, Alla Taǵala bizderiń kúnálarymyzdy jarylqap, ózimizdi jánnatqa kirgizbek. Sondyqtan, orazanyń qadirin túsinip, saýabyn bilsek...
