ORAZANYŃ PARYZ BOLÝYNYŃ HIKMETI
Oraza – Islamnyń sharttarynyń biri bolǵan paryz ǵıbadat. Baqara súresiniń 183-aıaty oraza ustaýdaǵy basty hıkmettiń júrekterimizge meıirimdilik, márhamat, taqýalyq jáne Alladan qorqý sııaqty máni joǵary sezimderdiń negizin qalyptastyrý úshin ekenin bizge bildiredi.
Oraza – dinimizdegi eń úlken ǵıbadattardyń biri. Kúná men jamandyqqa aparatyn joldar orazamen buǵattalady. Jamandyqty ámir etýshi nápsimiz tek oraza arqyly tárbıelenedi. Oraza ustaýshylar aqyl men sanasyna ıe bolady jáne nápsini quryqtaýdy biledi. Sol sebepti ardaqty paıǵambarymyz sallallahý aláıhı ýá sállám nápsilerine ıe bola almaıtyndar jaıly «Oraza ustasyn, sebebi orazanyń tıgizer áseri mol» degen.
Oraza ustamaǵan sabyr etýdi bilmeıdi, nápsini tyıa almaıdy, al toqtyqta ómir súretinder bir kún ash júrse ólip qalamyz dep oılaıdy jáne osylaı oılaý arqyly orazany zııandy dep ton pishedi. Al oraza bolsa jeke adam úshin meıli kópshilik úshin úlken rýhanı tárbıeni qalyptastyrady. Sondaı-aq, asqazan men deneniń demalýyn qamtamasyz etkeni úshin adam aǵzasy úshin medıtsınalyq paıdalary da bar. Orazanyń denege, rýhqa, kópshilikke jáne minez-qulyqqa berer paıdasy – orazanyń paryz bolýynyń negizgi sebep pen hıkmeti emes.
Orazanyń paryz bolýynyń negizgi sebebi - Allanyń ámirine boısuný, Allaǵa qul bolýdyń lázzatyn seziný, rýhty ekijúzdilikten tazartý, Allanyń qorǵaýynda bolý úshin nápsimen kúresý bolyp tabylady. Alla taǵala hadıs qýdsıde bylaı deıdi: «Oraza men úshin, onyń saýabyn men ǵana bere alamyn», – deıdi.
Mine, qıyn sııaqty bolyp kórinetin oraza osyndaı keremet ǵıbadat. Oraza «Baqara» súresiniń 155-shi aıatynda aıtylǵan: «Senderdi azdap qorqynyshpen jáne azdap ashtyqpen synaımyz...» degen «az ǵana ashtyqtan» keıin aqyrettegi uzaqqa sozylatyn ashtyqtan aman bolý úshin jáne sabyrlylarǵa ǵana beriletin qarymy mol úlken olja.
