ORAZA AIT QUTTY BOLSYN!
Naýryzbaı qajy TAǴANULY,
Qazaqstan musylmandary dinı
basqarmasynyń tóraǵasy, Bas múftı
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qurmetti otandastar!
Sizderdi kúlli musylman balasynyń ulyq merekesi – Oraza aıttyń kelýimen shyn júrekten quttyqtaımyn! Aıt qabyl bolsyn!
«Aıt» sózi – «merekeleý», «hal surasý», «bir-birin qýantý», «qýanyshqa toptalý» degen maǵynalardy bildiredi. Oraza aıt meıramynda júrekke meıirim, qýanysh sezimi uıalaıdy. Osynaý sáýleli sátte barshańyzǵa rııasyz nıetpen Allanyń amandyǵy men berekesin tileımin. Jaratqan januıalaryńyzǵa jar bolsyn!
Oraza aıt – bir aı boıy oraza ustap, yqylaspen jaqsylyq jasaǵan adamnyń qurmetke, marapatqa ıe bolatyn sáti. Alla Taǵala: «Men paryz etken orazany pendelerim ótep, aqysyn alýǵa (aıt namazyn óteýge) meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin...» deıdi. Rabbymyz barshamyzdyń qýanyshymyzdy arttyryp, eki dúnıede de mereıimizdi ústem etkeı.
Alla Taǵala ustaǵan orazamyzdy, muqtaj jandarǵa úlestirgen zeketimiz ben pitir sadaqamyzdy, bergen aýyzasharymyzdy qabyl etip, mol saýap jazǵaı.
Saýaptar eselenip jazylatyn berekeli aıda kóńili jabyrqaý jandardyń júregine qýanysh syılaýǵa tyrystyq. Osy rette Qazaqstan musylmandary dinı basqarmasynyń ıgi bastamasyna ún qosyp, meshitterimizde atqarylǵan izgi is-sharalarǵa, «Ramazan syıy» qaıyrymdylyq aktsııalaryna belsendi túrde úles qosqan barsha jomart jandarǵa Allanyń nury jaýsyn deımin.
Oraza aıt merekesi qutty bolsyn! Ár shańyraqqa baq pen bereke, birlik pen tatýlyq tileımin. Alla Taǵala kelesi Ramazan aıyna da tórt kózimiz túgel aman-esen jetip, ıgi basqosýlarda júzdesýdi jazǵaı. Elimiz aman, jurtymyz tynysh, táýelsizdigimiz baıandy bolǵaı! Áýmın!
