Meıirimsiz júrek – jetim
Biraz kúnder boıy áleýmettik jelilerde qazaqtyń órimdeı bir top jas jigitteri tórt aıaqty túz taǵysynyń bóltirikterin aıaýsyz, tipti jan túrshigerlik árekettermen jandaryn qınap, óltirip jatqanyn túsirgen vıdeorolık kezip júrdi. Qazirgi tańda áleýmettik jeli jastardyń birden-bir aqparat kózi bolyp otyrǵanyn eskersek, osy tárizdes aqparat, vıdeorolıkter arqyly jeli qoldanýshylaryna ashyqtan-ashyq qatigezdikti, zulymdyqty, ar-namystyń joqtyǵyn nasıhattap jatqandaı kórinedi. Árıne, pikir bildirýshilerdiń basym kópshiligi narazylyqtaryn, bul zulymdyqtyń saldary qandaı bolatynyn jazyp jatqanymen de, kóz kórdi! Demek, «osylaı da jasaýǵa bolady eken» degen oılardyń jastardyń júregine uıalap qalmaýyna kim kepil?! Teginde, mundaı masqaralyqty janýarlarǵa jasap jatqan jetkinshek, qoǵamda jetile kele adamdarǵa qoldanyp júrmeıdi me degen saýaldar mazalaıdy...
Dinimiz salt-dástúrimizben ushtasyp ketken halyqtyń urpaǵy emespiz be? Tipti, oınap júrgen balasyna qumyrsqanyń ıleýin de buzýǵa bolmaıtynyn, kepterdiń abaısyzda uıasynan túsip ketken saryaýyz balapanyn aıalap, jyly uıasyna qaıta jetkizýdi aıtyp otyratyn apa-ájelerimiz azaıyp bara ma degen oı keledi. Qaýipti zııankes jylannyń ózi abaısyzda úıge kirip ketse, basyna aq quıyp shyǵaryp salmaýshy ma edi... Qazirgi tańda qoǵamdy qatigezdik jaılasa, ol – Qasiret!!!
Árbir otbasyna, ul-qyzy «asqar taýym» dep biler ákeler men aıaýly analarymyzǵa aıtarym: bolashaq ADAM bolsa dep tárbıelep otyrǵan óz urpaǵynyń júregin bala kúninen qatigezdik pen zulymdyq ataýlyny uıalatpasa eken. Abaı atamyz on tórtinishi qara sózinde: «Tiri adamnyń júrekten aıaýly jeri bola ma? Bizdiń qazaqtyń júrekti kisi degeni – batyr kisi degeni. Onan basqa júrektiń qasıetterin anyqtap bile almaıdy. Raqymdylyq, meıirbandylyq, ártúrli iste adam balasyn óz baýyrym dep, sezine oılaǵandaı olarǵa da bolsa ıgi edi demek, bular – júrek isi», – deıdi. Sondyqtan da, oshaǵymyzda urpaǵymyzdyń júregin meıirim men jylylyqqa baýlyp, ǵajaıyp ómir súrýge úıreterlik, baýyrlar!!!
Gúlzıra Jıdebaı
