«MENMIN» DEGEN ALLAǴA QUL BOLMAIDY, MENMENDIKTEN ARYLǴAN TUL BOLMAIDY»
E, pende menmendiginen qutylmaı Qudaıǵa qul bola almaıdy. Búgingi myna aqyr zamanda jer betinde sary shegirtkedeı qaptaǵan osy menmendik. Adamnyń mendigi. Jalpy, qazaq osy «mendik» sózin jalpy ǵashyqtyqqa qatysty qoldanyp ketken. Áıtkenmen, «mendik» tákapparlyq sózimen bir bolsa da basqasha aıyrmashylyǵy da bar. «Men» degen tek ózim bolsam, ózim kórinsem, eldiń bári meni tanysa, bilse deıdi.
Mine, osydan árıne takapparlyq kelip týady. Alaıda, «men» degenniń júreginde Alla bolmaıdy. Alla bolsa da ol báribir Oǵan laıyq qul bola almaıdy. Quranda Alla Taǵala osy menmendigin, mendigin jeńgen, tazartqan Ózine laıyq qul, al jeńe almaǵandar ózgege qul bolatynyn aıtady. Osy bir ózin tanytý, jarnamalaý bizdiń qazaqta qaıdam kóptegen elderde dertke aınalǵan. Áıtkenmen «mendik» adamǵa Allany taný úshin berilgen qasıet. Óziniń bar jáne ózi, men ekenin bilgen ol sol arqyly salystyryp Allanyń bar ekenin hám Onyń ózin jaratqan Qudaı ekenin bilý úshin, sezý úshin berilgen. Jáne sony ólshep bilgen soń da sol mendik almasyn tasqa uryp syndyryp, Qudaıǵa pánı bolý úshin berilgen. Nemese mendik beıne bir aına tárizdi. Sol arqyly kúndi kóresiz. Al kún sáýlesi aınaǵa túskende siz aınany taba almaı qalasyz. Allaǵa qul bolǵan soń adam mendiginen tutas aıyǵyp, Oǵan moıynsunbaq.
Ilgeride Shıblı degen bir áýlıe kisi bolǵan. Bir kúni bir kisi odan osyndaı mártebege qalaı jetkenin suraıdy. Sonda álgi áýlıe jaryqtyq óziniń basynan ótken mynadaı bir oqıǵasyn aıta ketedi.
«Bir kúni jazdyń shilińgir shildesinde bir ózenniń jaǵasynda salqyndap otyrǵan bolatynmyn. Bir kezde aıdaladan bir ıt ózen jaǵasyna kele qaldy. Ózi ábden shóldep, qatalaǵan. Tili salaqtap, eki ókpesimen áreń dem alyp tur. Ol sýdy uzaqtan kórip alasuryp keldi de dál sýǵa basyn salǵany sol edi sýdaǵy óz beınesin kórip irkilip, shoshyp keıin qaıtyp ketti. Sýdaǵy ózine qaraǵan ózge bir ıt ony sýdan qashyrǵan edi. Ózi qatty shóldep tur. Baraıyn dese álgi aıbarly, susy jaman ıt muny sýǵa jaqyndatar emes. Birneshe márte qoryqsa da amalsyz shól qysqan soń baryp kórip edi, álgi bóten ıt jolatar túri joq. Endi qaıtsin! Biraq shólge shydaı almaǵan ıt arsyldap kelip sýǵa qoıyp ketti. Osy kezde ǵana álgi bóten ıt laılanǵan sýdyń ishinde joǵalyp ketti. Ol sýǵa bir batyp, bir shyǵyp qanǵansha ishti.
Mine, osy bir kórinis maǵan «men degen meniń perdem. Allaǵa jaqyndatar emes. Endeshe, ony aıaqasty etýim, laılaýym qajet» degen túsinik berdi. Osylaısha mendigimnen, menmendigimen bas tarttym, ózimdi tárk ettim, umyttym. Mine sol kezde ǵana perde túrilip, Allaǵa qul bolýǵa jol ashyldy. Al osy jolǵa álgi shólden qatalaǵan ıt maǵan jolbasshy boldy».
Iá, Qudaıǵa qul bolamyn degenge ıt ekesh ıt te sebepker bola alady. Menmendigin qımaǵanǵa áýlıe de jol kórsete almaıdy.
Muhıtdın ISAULY,
ıslamtanýshy
