MÁÝLITTIŃ MÁNI
Qazir Máýlit aıy. Máýlit - Paıǵambarymyzdyń (sǵs) týǵan aıy. Demek, meıram. Musylmandarǵa tán ulyq mereke. Alaıda asyra dinshilder, negizinen árýaqty moıyndamaıtyndar, Máýlitti toılaýdy qosh kórmeıdi. Toılaıtyndardyń ózi Máýlit mánin shynaıy túısine almaıdy. Sondyqtan da ony tek materııaldyq túsinik turǵysynda ǵana atap ótedi. Ras, Máýlit jyr oqylady. Paıǵambarymyzǵa (sǵs) qarata salaýattar, madaqtar aıtylady. Ata tegi, ómirbaıanynan da birshama maǵlumattar beriledi, dinı ánder oryndalady. Sonymen támam.
Al shyntýaıtyna kelgende, Máýlit atalyp ótip jatqan jerge Paıǵambarymyzdyń (sǵs) Ózi keledi. Bul - rýhanı tanym. Demek Máýlit te rýhanı mánge ıe. Sonda ol qandaı mán?
***
Basy ashyq jáıt. Alla myna materııaldy álemge aralaspaıdy. Aralaspaǵan soń jer betinde jaqsylyq, qut-bereke, ádildik, janyńdy rahatqa bóleıtin lázzatty ómir bar degen oıdy qııaldan alyp tastaý kerek. Alaıda bar adam balasynyń armandaıtyny sondaı ómir. Shyntýaıtyna kelgende, ondaı ómirge negizinen urlanǵan jan ıeleri ǵana qol jetkizedi. Musylmandardyń kedeı bolatyny sondyqtan. Ras, baılar da bar. Áıtse de olar ózderin ol baılyqtyń ıesi sanamaıdy. Ie - Alla. Biz tek tutynýshymyz. Já, osy jerden shegereıik. Sebebi, ol - bólek áńgime. Deıturǵanmen "urlanǵan jan" mánin sál-pál asha ketelik.
Baıybyna barsaq, "urlanǵan jan" ıesi - siz ben biz. Naqtylasaq - barsha adamzat. Sebebi biz jerge baılanǵanbyz. Soǵan oraı jer betindegi ıgilikterden bizdiń janymyz rahat tabady. Sonda Alla joq jerden rahat tabatyn ol qandaı jan?
Jaýap aıqyn. Áıtse de biz onyń atyn atap, túsin tústemeı-aq qoıalyq. Aıtpaǵymyz, Máýlitti atap ótý qajettiligi osy jerden týyndaıdy. Sebebi, Máýlit oqylǵan kezde álgi jerdegi ıgilikterden rahat tabatyn jan óz negizine qosylady. Al ol qosylý - ıhsan arqyly júzege asady.
***
Adam balasy Alla Taǵalamen tek ıhsan arqyly baılanysady. Ihsan degenimiz, hadıste aıtylatynyndaı, Allany kórý, ne Allanyń seni kórip turǵanyna senim bildirý. Al biz bolsaq, Alla myna álemge aralaspaıdy dedik. Demek adam balasy ıhsandy ustaný arqyly Allalyq álemge ótedi. Mine, sol kezde baryp Máýlit máni ashylady. Naqtylasaq, Máýlit tek sol kezde ǵana oqylady. Sol Máýlitti oqyǵandar, bir sózben aıtqanda, biz aıtqan Máýlit mánine sengender, Paıǵambarymyzǵa (sǵs) úmbet bolady. Úmbet bolǵan soń, árıne, Paıǵambarymyzben (sǵs) qaýyshady. Máýlit oqylǵan kezde erekshe sezimge bólenetinder de, jylaıtyndar da solar.
***
Eger baıybyna barsaq, Máýlit tek Paıǵambarymyz Muhammed Mustafanyń (sǵs) ǵana emes, barsha adam balasynyń týǵan kúni. Al siz ben bizdiń týǵan kúnimiz - urlanǵan janǵa tán. Shyntýaıtyna kelgende, ol - qaraly kún. Uǵynyqtylyq úshin sóz kezegin Shádi Tóre Jáńgirulyna berelik:
"Əlemnen on segiz myń əýel buryn
Jaratty Paıǵambardyń Alla Nuryn.
Áýýalý maa halakallahý nýrı degen
Haqynda dalel boldy hadıs munyń!
Aspan-jer, arshy-kúrsi, laýhýl-qalam
Jaraldy osy Nurdan bəri tamam!"
Mine osy Paıǵambarymyz (sǵs) nurynan siz ben biz, ıaǵnı bútkil adam balasy jaratylǵan. Máýlit toıynda biz sol kúndi qaperge alamyz. Qaperge alyp qana qoımaı, urlanǵan, adasqan janymyzdy óz negizine qosamyz. Paıǵambarymyzben (sǵs) qaýyshamyz. Allany kóremiz. Rahymyna shomamyz. Biz sol kezde ǵana ózimiz sońyna túsken jer betindegi "ıgilikterdiń" tozaqtyń otyny ekenine kóz jetkizemiz.
Qudııar BILÁL
