HARAM NÁRSELER ǴIBADATTYŃ QABYL BOLÝYNA KEDERGI KELTIREDI

Paıǵambarymyz (s.a.ý.) bylaı degen: “Taǵdyrym qudiretindegi Allanyń atymen ant eteıin; kim-kimniń de qolyna arqan alyp taýǵa shyǵyp otyn jıyp, sosyn ony arqalap ákelip satyp, tapqanyn qorek qylýy jurttan qaıyr suraǵannan áldeqaıda qaıyrly. Jáne (jerden) topyraq alyp jegeni Alla Taǵalanyń haram qylǵanyn qorek qylǵannan qaıyrly”.

Iýsýf ıbn Ásbat rahımáhýllah bylaı degen: “Bir jas jigit Alla Taǵalaǵa ǵıbadatpen ýaqyt ótkizip júrgende Shaıtan kómekshilerine “Mynany baqylańdar, ishken-jegeni qaıdan (halal ma, haram ba)?” deıdi. Eger haram bolsa, Shaıtan “Oǵan tıispeńder. Talmaı eńbektenedi, sharshaıdy. Onyń sol kúıi senderdiń tilekterińe jetkilikti. Óıtkeni ol qansha ǵıbadat jasasa da, haram jegendikten onyń ǵıbadattary ózine esh paıda bermeıdi” deıdi.

Muny Paıǵambarymyzdyń (s.a.ý.) myna hadısi naqtylaı túsedi: “Áldekim qaıyrly, uzaq saparǵa shyǵady, shash ósken, aryp-ashqan, bet-aýzyn shań basqan. Sol adam qolyn kókke jaıyp ‘Ýa, Rabbym! Ýa, Rabbym!’ dep duǵa jasaıdy. Al óziniń jegeni haram, ishkeni haram, kıgeni haram. Haram qorekpen adam bolǵan. Ondaı adamnyń duǵasy qalaı qabyl bolsyn?”

Paıǵambarymyz (s.a.ý.) basqa hadısterinde bylaı deıdi:

“Bir perishte únemi kúni-túni Báıtúl-maqdıstiń ústinde ‘Alla Taǵala haram jegen adamnyń nápil jáne paryz ǵıbadattaryn qabyl almaıdy’ dep daýystaıdy”.

“Kimde-kim haram qarjymen qajylyq jasap, lábbáık dese, bir perishte (oǵan) ‘Lá lábbáık ýálá sadáık, qajylyǵyń qabyldanbady’ deıdi”.

“Kimde-kim on dırhemge kóılek satyp alyp, oǵan tólegen qarjynyń bir dırhemi haramnan (tabylǵan) bolsa, ol kıimdi kıip júrgende Alla Taǵala onyń namazyn qabyl almaıdy”.

Omar (r.a.) “Bizder haramǵa urynýdan qorqyp halaldyń onnan toǵyzyna jolamaıtynbyz” degen.