ISLAM – YNTYMAQ PEN BIRLIK DINI
Adamzat árqashan jaqsy ómir súrýdi, baqytqa jetýdi ańsaıdy. Onyń joly ózin qorshaǵan ortamen jaqsy qarym-qatynasy arqyly júzege asady. Sol kezde izdegen baqytty taýyp, onymen turaqty bola alady. Qoǵam bolyp ómir súrýden basqa tańdaý múmkindigi joq adamnyń baqyty da, baılyǵy da, eldiń yntymaǵy men birligine baılanysty. Adam óziniń keıbir problemalaryn basqa adamdarmen bólisý qajettiligin sezinedi. Sebebi, kezdesetin keıbir qıyndyqtardy jeke kúsh-jigerimen jeńe almaýy múmkin. Dál osy sátte, túrli sala mamandary men qabilet ıelerin qamtyǵan qoǵamnyń orny erekshe bolmaq. Ár túrli kózqarasy men pikiri bar adamdardyń birin basqasymen salystyrǵanda tómen dep baǵalap, ony qorlaý durys emes. Halyq arasynda bilimdi-bilimsiz, kúshti men álsiz, baı men kedeı qatar ómir súrgendikten, bir-birine zulymdyq jasamaı, ózara tyǵyz baılanysta bolǵan kezde ǵana el bolyp, jurt bolyp ómir súrýdiń máni arta túsedi.
Adamzatty baqytqa jeteleıtin asyl dinimiz – Islam. Dinimizdiń mańyzdy dep qaraıtyn máselelerdiń biri - adam balasynyń árqashan qýanysh pen shattyqta bolýy. Al, onyń kilti retinde aýyzbirshilikti, yntymaq pen birlikti kórsetti. Yntymaq pen birlik bar jerde baýyrlastyq, beıbitshilik, molshylyq, bereke men meıirimdilik bolady. Eki dúnıe baqytyna qol jetkizý úshin eń áýeli Allanyń kitabyna, Elshisiniń (s.ǵ.s.) sózine qulaq asyp jáne aýyzbirshilikte bolý qajet. Qasıetti Quran Kárimde: «Allanyń jibinen (Qurannan) myqtap ustanyńyzdar, bólinbeńizder», – dep buıyrǵan.
Alla Taǵala osydan keıin birlikti buzbaý kerektigin eskertedi: «Ózderine aıqyn dálelder kelgen soń bólingender sııaqty bolmańdar. Olarǵa úlken azap taǵaıyndaldy».
Ardaqty Paıǵambarymyz (s.ǵ.s.): «Men sizderge kópshilikpen birge bolýǵa keńes beremin. Bólinýden saqtanyńyzdar. Shynynda da, shaıtan jalǵyzdyń janynda bolady. Ol eki adamnan aýlaq júredi. Kimde-kim jumaqtyń tórin qalasa, kópshilikten uzaq bolmasyn...», – degen.
Quran aıattary men hadıs shárıften túsingenimiz, bizdi bólinip ydyramaýǵa, bálkim birigip, tatý bolýǵa shaqyryp jatyr. Tarıhqa qaraıtyn bolsaq, birligi berik, yntymaǵy jarasqan eldiń shyń basyna shyqqandaı bıiktep, joǵarylaǵanyn, al ózara bólinip, birligi men tirligi taıaz eldiń tuǵyry qulap, tarıh sahnasynan birjola óship ketkendigine kýámiz. Buny dana babamyz:
Birligi kúshti el ozady,
Birligi joq el tozady – dep, birliktiń bereri mol ekenin aıtyp ótken. Alla elimizge amandyq, halqymyzǵa yntymyq pen birlik bersin!
Haırıdınov Ońǵar
«Raqymqyzy Raısa ana» meshitiniń naıb ımamy
