IMAN

Dúnıedegi eń baqytty adamdar - musylmandar. Sebebi, Allaǵa senedi. Siz Allaǵa senýdiń qandaı baqyt ekenin bilesiz be? Eger bilseńiz bar ǵoı, joq olaı emes, eger senseńiz bar ǵoı, ómirde sizdi buǵaýlaǵan, qursaýlaǵan, aıaǵyńyzǵa tusaý bolǵan, basyńyzdy aýyrtyp, baltyryńyzdy syzdatqan máselelerdiń bári joq bolyp ketedi. Tek senińiz.

Ol senimniń qandaı senim ekendigi týraly sál-pál túsinik. Jalpy myna ómirdiń ózi jalǵan, turaqsyz senimderden turady. Adam balasy sol senimderge úmit artyp ómir súredi. Máselen bireý - joǵary shendi tanysyna, taǵy bireý - qomaqty qarjysyna, bireý - aqylyna, taǵy biri - talantyna senedi. Kúshine senetinder de az emes. Qyz-qyrqyndar bolsa da ajaryna senedi. Mundaı senim memleketterge de tán. Alaıda bul senimderdiń eshqaısysy túptep kelgende eshkimge opa bermegen. Sebebi ol senim ımandy urlaıdy. Baıybyna barsaq, biz tizbelegen "senimderdiń" qaı-qaısysy da Allaǵa degen senimge kóleńke túsiredi. Biz "kóleńke" dep sypaıylap aıttyq. Bolmasa ol bar ǵoı...

Sonymen senim de árqıly bolady eken. Biz ózi keshegi kúni KSRO ıdeologııasyna, kommýnıstik partııaǵa senim artqan halyqtyń ókilimiz. Soǵan oraı jalpy senimniń bári baıandy bola bermeıtinin eptep bilemiz. Táýelsizdikke qol jetkizgennen keıin birden dinge senim artqanymyz da sondyqtan. Biraq sol dinniń de ushpaqqa shyǵaryp jatqany shamaly. Sebebi, qansha senim artsaq ta, tipti juma saıyn meshitke bas suqsaq ta kósegemiz kógermeı-aq qoıdy.

Mynandaı bir támsil bar. Bir adam óziniń Allaǵa degen ǵıbadatyna júdá qatty senim artady eken. Senim artatyn da jóni bar. Oǵan Alla da ǵumyrdy bergen eken. Sol uzaq, 500 jyldyq ǵumyrynda Allaǵa tapjylmaı qulshylyq jasapty. Qulshylyq jasaǵanda, kúndiz-túni namazdan bas kótermeıdi eken. Sol ǵıbadatyna oraı Alla da onyń dál qasynan bir qurma (anar dep te aıtylady) aǵashyn ósirip qoıypty. Álgi dindár sol aǵash jemisin jep jan shaqyrǵan soń ǵıbadatyn qaıta jasaıdy eken. Ómiriniń sońynda ol: "O, Alla! Meniń janymdy Ózińe sájde jasap jatqan kezde al", - dep duǵa jasapty.

Duǵasy qabyl bolady. Alla aldyna barǵanda Jaratýshy ıemiz perishtelerge: "Mynany meniń rahymymmen jánnatqa kirgizińder", - dep ámir etedi. Sonda álgi dindár: "Joq, men jánnatqa ózim jasaǵan ǵıbadatym arqasynda kiremin", - deıdi. Alla Taǵala ony qaıta aldyryp, 500 jyl jasaǵan ǵıbadaty saýabyn tarazynyń bir basyna qoıyp, ekinshi basyna eki kóziniń birin qoıǵanda, tarazy basy teńesedi. Onyń sonsha jyl toqtaýsyz jasaǵan ǵıbadaty adam balasyna Alla bergen bir ǵana janardyń qyzmetine teń bolady. Óz qateligin túsingen dindár táýbaǵa kelip, Alla rahymyna qaıta qaýyshady.

Sonymen qulshylyq, ǵıbadattyń da jaıy belgili boldy. Alaıda hakim Abaı: "Ózińe sen", - deıdi. Alaıda ol sózge de shamaly tápsir kerek. Ol tápsir hakim Abaı tilinde "Men" jáne "Menińki" delinedi. Biz hakim Abaı "Men"-in "Ol" degenbiz. Al Ol degenimiz - Alla. Sonda hakim Abaıdyń aıtqany da Allaǵa degen senim ekendigi málim bolady.

Áýeli saýal. Biz Allaǵa ne úshin senip, ne úshin ıman keltiremiz? Bul saýalǵa biz: "Tozaqtan qoryqqannan", ne bolmasa: "Jánnatqa qyzyqqannan", - desek, onda onymyz biz keltirgen ıman mánin jete túsinbegendik bolyp shyǵady. Sondyqtan kimge de bolsyn áýeli ózi keltirgen ımannyń mánin jete túsinip alǵany jón. Sebebi, qaı senim de ıman. Soǵan oraı hakim Abaı aıtpaqshy, qaı júrekte de eki qýanysh, eki qaıǵy birdeı bolmaıdy. Iman da sol tárizdi. Aqıqat boı kórsetken jerde jalǵanǵa oryn qalmaıdy. Al aqıqat degenimiz - Alla.

Uǵynyqtylyq úshin aıtaıyq, adam dúnıeden ozǵan kezde onda tek ıman ǵana qalady. Iman - Allaǵa degen senim. Senim - Alla. Odan basqa eshnárse joq. Eger senim kámil bolsa, ár musylmanda osy dúnıeniń ózinde sol ımannan basqa eshnárse bolmaıdy. Sondyqtan da ony myna jalǵan álemniń qýanyshy da, qaıǵysy da, odan ózge áshekeı-úshekeıleri de baýraı almaıdy. Tipti ol ózine áser etetin Alladan ózge birnárse bar dep te bilmeıdi. Bizdiń: "Eń baqytty adamdar - musylmandar", - deýimiz sondyqtan.

Sonymen ıman degenimiz, Alladan ózge barlyq nárseni joq etý degen sóz eken. Biz soǵan, ıaǵnı ımanǵa ıelik etkende ózimiz de Allalyq bolmysqa enemiz. Sebebi biz Odan ózgeniń bárin joq ete aldyq qoı. Mine endi sol adam tozaqtan qorqa ma? Sondaı-aq sol adamdy jánnattyń ózimen, ne ondaǵy hor qyzdarymen qyzyqtyrýǵa bola ma? Baıybyna barsaq, ol adam búkil jaratylystardan bıik turady. Al jánnattyq nyǵmetter oǵan kórsetiletin syı-sııapat qana.

Tap sol sııaqty myna álemniń de ózine tán syı-sııapattary bar. Ol syı-sııapatqa osy ómirge baılanǵan adamdar qol jetkizedi. Jáne de olar sol syı-sııapattar lázzatynan eshqashan ajyraǵysy kelmeıdi. Sonymen qatar olar jánnatty da ózderiniń sol materııaldyq tanymy turǵysynan baǵalaıdy. Mundaı túsinik keı dindárlarǵa da tán. Olardyń óz ýaǵyzdary barysynda hor qyzdaryn qaperge ala beretinderi sondyqtan. Baıybyna barsaq, jánnat nyǵmetterin hor qyzdary tóńiregindegi áńgimelermen ǵana baǵalaý, Alla múmkindigine shekteý qoıǵandyq bolyp tabylady. Shyntýaıtyna kelgende ol múmkindik ıesi Allaǵa ıman keltirgen musylman adamnyń ózi. Hakim Abaısha aıtsaq, ol - "Men" de, al jánnattyq nyǵmetter - "Menińki". Naqtylasaq, senińki. Eger ıman keltirseń.

Qudııar BILÁL