IMAM AǴZAMNYŃ (RAH.) NASIHATY

Eı, balam! Saǵan aıtar túrli nasıhatym bar, olardy myqtap esińde saqtap, tıisti úlgide amal etetin bolsań, dúnıe men aqyrette baqyt pen salaýatqa qaýyshasyń:

* Árdaıym taqýalyqtan aırylma. Únemi Alla taǵaladan qorqyp ózińdi kúná jasaýdan qorǵa. Alla taǵalanyń buıryǵyn oryndaýyń tek oǵan qulshylyq etý úshin bolsyn.

* Isteýiń tıis nárselerdi bilmeı qalyp júrme! (Dúnıe men aqyret isinde kem-ketigińdi tolyqtyr, bilmeıtinderińdi úırenýge kúsh sal).

* Ózińe kelgende sypaıy jáne ádil bol. Qajet bolmaıynsha nápsińdi erkine jiberme. 

* Eshbir musylmanǵa qastyq jasama.

* Qanaǵatshyl bol. Alla taǵalanyń saǵan násip etip, buıyrtqan dáýlet pen qyzmetke razy bol. Ashkóz bolma.

* Basqalardan suraýdan saqtaný úshin qolyńdaǵy nyǵmettiń qadirin bilip, saqtaýda uqypty bol, ysyraptan saqtan.

* Jurttyń kózi ózińde bolǵanyn qalama!

* Buıryq ne ruqsat bolmaıynsha eshkimniń jumysyna aralaspa!

* Aldyńnan jurt shyqqanda olarǵa sálem ber. Sóıleý qajet bolsa, salıh kisilerge unaıtyn, al jaman adamdy jamanshylyqtan tyıatyn nárse aıt, sóziń qysqa ári nusqa bolsyn.

* Alla taǵalany kóp zikir et, esińnen shyǵarma, Rasýlýllahqa (s.a.ý.) salaýatty kóp aıt.

* Kúnbe-kún Quran oqyp saýabyn Rasýlýllanyń (s.a.ý.) pák rýhyna baǵyshtap turǵaısyń.

* Kórshilerińe jaqsylyq, qaıyrym jasa, kóńilderin taba bil. Olardyń jaısyz isine sabyr et.

* Áhlı súnnet ýál-jamaǵattan ajyrama. Bıdǵatshylar men adasýshylardan saqtan.

* Barlyq isińe yqylas qoı, halalynan iship-jeýge kúsh sal, haramnan aýlaq bol.