DUǴA

Basyńyzǵa kele jatqan bále-jalany sizdiń Alladan jasaǵan duǵa-tilegińiz kútip alady ári olar Qııamet kúnine deıin bir-birimen arpalysýmen bolady!

Alla Elshisi (oǵan Allanyń ıgiligi men sálemi bolsyn) bylaı degen:

“Saqtyq – taǵdyrdan qorǵan bola almaıdy, al duǵanyń bolǵan da, bolmaǵan da nársege septigi tıedi. Bále túsip kele jatqan ýaqytta ony duǵa kútip alady. Sóıtip olar Qııametke deıin kúresip jatady”

Bul hadısti Aısha anamyzdan (r.a) Imam ál-Hakım rıýaıat etken.

Ibn Omar (Alla ákesi ekeýine razy bolsyn): «Paıǵambar (oǵan Allanyń ıgiligi men sálemi bolsyn):

 «Duǵa basqa túsken nársege de, túspegen nársege de paıdaly. Sondyqtan, eı, Allanyń quldary, duǵa qylyńdar!» dedi», – dese,

Salman (Alla oǵan razy bolsyn) Alla Elshisiniń ﷺ:

«Jazmyshty tek duǵa ǵana qaıtarady, ǵumyrdy izgilik qana uzartady», – degenin jetkizgen.

Demek, aýzynan Allasyn tastamaı, Jaratýshysyn únemi esine alyp, óziniń Oǵan muqtaj ekenin sezinip, duǵada júrgen adam eshteńeden utylmaıdy, kerisinshe ózin kútip turǵan kesir-kesapattan qutylyp, báleden aýlaq bolady eken.

 Qazaqtyń "dýaly aýyz adam", "aýzynyń dýasy bar" dep keı adamdardy qadir tutyp, qurmet kórsetetini, bir báleden aman qalsa "Qudaı qaqty" deıtini, mine, osydan bolsa kerek.