DÁLELIŃ BAR MA?
Dinimiz ótirik aıtqandy qoshtamaıdy. Sondyqtan shynaıy musylmandarda bir adam ekinshi bireýge ótirik aıtady-aý degen uǵym da, túsinik te bolmaıdy. Osy bolmys dástúrli dinimizdi ustanǵan bizdiń ata-babalarymyzǵa tán edi. Sondyqtan da olar "ógiz týdy" dese de ılanatyn. Al senim - ımannan. Islam tarıxyn qaýzaıtyn ne bir áfsana, xısa, dastandar bar. Qııal-ǵajaıyp, ańyz áńgimeler de jetip artylady. Kónekóz qarııalar solardy kózine jas alyp otyryp tyńdaýshy edi. Ańǵaldyq ta solarǵa tán bolatyn.
Birtindep zaman ózgerdi. Dinsizder boı kórsete bastady. Ańǵal qazaqty sol dinsizder urshyqsha ıirdi. Sebebi olar álgi qýlar ne aıtsa da ılana berýshi edi. "Nege olaı?" "Olaı bolýy múmkin emes" deıtin túsinikter olar uǵymynda múlde bolmaıtyn.
Al qazir álemde jańa dinı túsinik qalyptasty. Olar basqa emes, sózińniń dáleli bolmasa Paıǵambar aıtty deseń de senbeıdi. Olarǵa Qudaıdyń jón sózin aıtsań da dálel keltir deıdi. Osyndaı ekiudaı pikir áý bastan bar. Máselen biz Paıǵambarymyzdyń (sǵs) mıǵrajǵa kóterilip, Allamen tildesip qaıtqandyǵyna ıman keltiremiz. Bul oqıǵaǵa kezinde saxabalar shúbásiz sense, múshirikter dálel suraǵan. Qazir dúnıe basqa baǵytqa burylyp ketti. Bul kúnde dáleldi ózderin taza musylmanbyz deıtinder suraıtyn boldy da, al dáleldi álgi dinsiz múshirik ǵalymdar keltiretin boldy.
Biz "Myna álemniń negizi - árýaq" deımiz. Álgi dindárlar: "Dáleliń bar ma?" deıdi. Biz múshirik ǵalymdar tapqan antımaterııany kóldeneń tartamyz. Ondaı dálelder Quranda da bar. Biraq olar álgiler kózine kórinbeıdi dá. Mynandaı bir támsil bar.
Bir zamanda Horasanda Paıǵambarymyz (sǵs) áýletinen (áhli báıt) bolǵan bir áıeldiń kúıeýi qaıtys bolyp, úsh balasymen jesir qalady. Kúnkórisi qıyndaǵan soń kórshi qalaǵa baryp, bir meshitti panalaıdy. Balalaryn sol meshitte qaldyryp, ózi sol qalada dindarlyǵymen aty shyqqan bir baıǵa baryp: "Áhli báıttan edim, Paıǵambarymyzdyń (sǵs) qurmeti úshin kómek kórsetseńiz eken" dep, ótinish jasaıdy. Sonda baı oǵan: "Áhli báıttan ekenińe dálel keltir" dep, kómek kórsetpeıdi. Kóshede qapa bolyp kele jatqan oǵan bir májýsı jolyǵyp, odan nege renjip kele jatqandyǵynyń sebebin suraıdy. Áıel oǵan óziniń bar jaǵdaıyn aıtyp shyǵady. Álgi adam ony balalarymen birge úıine alyp baryp, qonaq etedi. Sol túni baı musylman tús kóredi. Túsinde qııamet bolypty. Ol Paıǵambarymyzdyń bir keremet saraıdyń qasynda turǵanyn kóredi de: "Bul kimge tıesili saraı?" dep suraıdy. Paıǵambarymyz: "Bir musylmandyki" deıdi. Sonda baı: "Men sondaı dinime berik, ǵıbadatty óte kóp jasaǵan musylmanyn" degende, Paıǵambarymyz: "Maǵan buǵan baılanysty dálel keltir" deıdi de, onyń óz násilinen shyqqan áıeldi balalarymen dalada qaldyrǵanyn qaperine salady. Ne aıtaryn bilmeı ábirjigen baı uıqysynan shoshyp oıanady. Ornynan tura sala álgi áıeldi izdep shyǵady. Olardyń májýsıdiń úıinde ekendigin bilgen soń sol úıge baryp, odan áıeldi qaıtarýyn suraıdy. Sonda ol: "Osy áýlettiń arqasynda úıime bereke kirdi. Ózim de ıslam dinin qabyldadym. Sondyqtan bul qutty qonaǵymdy sizge bere almaımyn" deıdi. Baı bolsa "Ber de berdiń" astyna alyp, ózeýrep qoımaıdy. Sol kezde álgi adam: " Sen qol jetkizbek bolyp sońynan júgirip júrgen saraıdy túsimde men de kórgenmin. Paǵambarymyz: "Meniń áýletimnen bolǵan jesir áıel seniń úıińde me?" dep surady. Men: "Iá" dedim. Paıǵambarymyz: "Endeshe myna saraı senińki" dedi dep, óz qonaqtarynan eshqashan aıyrylmaıtyndyǵyn kesip aıtady.
Bilgen jón. Iman degenimiz - senim. Al kez kelgen senim aqıqatqa aınalady.Sebebi, ol - Allaǵa degen senim. Al kúmán - Alla múmkindigin joqqa shyǵarý bolyp tabylady. Sondyqtan seneıik. Iman keltireıik. Alla múmkindiginiń sheksiz ekendigine.Esh dálelsiz.
Qudııar BILÁL
