BIRLIK TÚBI – BEREKE
Qazaq halqy ertede «Birlik bar jerde tirlik bar» degen bolatyn. Birlik barlyq nárseniń jeńisi bolyp sanalady.
«Birlik bar jerde - tirlik bar» degen qanatty sóz tatýlyq pen baýyrlastyqtyń aıǵaǵy sekildi. Bolashaqtyń birliksiz bolmaıtynyn boljaı bilgen babalarymyz osy qaǵıdany basty baǵyt etip ustaǵandaı. Ol atadan balaǵa mura bolyp, áli de jalǵasyn taýyp keledi.
Álemdik tájirıbede ulttar men ulystardy bir shańyraqtyń astyna biriktirip, bereke-birliktiń qadir-qasıetin kórsetip kele jatqan memleketter kóp emes. Mine, 130-dan astam ult pen ulystyń ókilderi tatý-tátti ómir súrip kele jatqan Qazaqstan búginde álem elderine úlgi-ónege.
Qazaqstan Respýblıkasyn meken etken 130-dan astam ult ókili kúni búginge deıin yntymaqtastyqqa, bir úıdiń balasyndaı tatý-tátti jarasymdy tirshilik keship keledi. Júzi basqa bolǵanymen júregi bir, tili basqa bolǵanymen tilegi bir, maqsat-múddesi ortaq, birligi myqty, dostyǵy berik ulttar qazaq eliniń salt-dástúrine, ulttyq qundylyqtaryna qurmetpen qaraıdy. Sondaı-aq qazaq halqynyń qarapaıymdylyǵy, qonaqjaılylyǵy, baýyrmaldyǵy úshin erekshe baǵalaıdy, bastysy – ózderi qonys tepken Qazaqstan jeriniń barlyq ulanymen aýyzbirshilikte týys bolýdy kózdeıdi.
Táýelsiz elimizde barsha qazaqstandyqtardy biriktirip, el bolashaǵynyń irgetasyn qalaýda tarıh, mádenıet jáne tildiń atqarǵan róli orasan zor bolǵanyn bárimiz moıyndaımyz.
Alla Taǵala Quran Kárimde bylaı deıdi: «Barlyqtaryń Alla Taǵalanyń dinine jabysyńdar da bólinbeńder. Sondaı-aq ózderińe Allanyń bergen nyǵmetin eske alyńdar. Óıtkeni bir-birińe dushpan edińder, júrekterińniń arasyn jarastyrdy, onyń ıgiligimen týysqa aınaldyńdar. Ottan bir shuńqyrdyń erneýinde edińder, senderdi odan qutqardy. Osylaısha Alla senderge aıattaryn týra jolǵa túsýleriń úshin baıan etedi» (Al Imran 103). Mine, Alla Taǵala osy aıattary arqyly Haq dinde bekem bolýǵa, sondaı-aq, qarsylaspaı, bólektenbeı birlikte bolýǵa shaqyrady. Bul sózderden keıin Alla Taǵala adam balasyna bergen nyǵmetin eske túsirýge buıyrady. Onyń syry musylmandardyń júregin qosý. Óıtkeni, Allaǵa moıunsynǵan musylmannyń basqa kisige zııan keltirýine bolmaıdy.
Tarıhqa úńilsek, bul aıat negizinen Mádına qalasynda ómir súrgen Aýsa men Hazraj rýlaryna túsken. Óıtkeni olar Islam kelmeı turyp bir-birimen dushpan bolyp, qastandyq istep turatyn bolǵan. Dushpandyqty dostyqqa aınldyrǵan Islam dini Alla Taǵalanyń musylmandarǵa bergen nyǵmeti emes pe?! Alla Taǵala basqa aıattarda birlik týraly mysal keltirip, bylaı deıdi: «Jáne Ol múmıderdiń júrekterin qosty. Eger sen, jer júzindegi nárselerdi tutas saryp qylsań da olardyń júrekterin qosa almaıtyn ediń. Biraq Alla olardyń aralaryn biriktirdi. Rasynda Ol, óte Ústem, asa Dana» (Ánfal 63). Osy aıat arqyly Alla Taǵala Óz Elshisi Muhammedke (s.ǵ.s) ne nársede de Allanyń qalaýy bolatyndyǵyn meńzep tur. Sondaı-aq, Alla qalamaıynsha bizdiń dúnıe saryp qylýymyz da esh paıda bermeıdi. Al Alla bizge Islamdy berip jáne musylmandar arasynda tatý bolýdy buıyrsa, birlikte bolýymyz – mindet bolmaq. Al zulymdyq isteý nemese qol kóterý kúná amaldardan bolyp sanalady.
Halqymyzda «Yrys aldy-yntymaq» degen qanatty sóz bar. Qashanda birligi bekem eldiń bolashaǵy jarqyn. Birlik bar jerde tirlik» bar ekenin umytpaıyq, aǵaıyn! Elimiz aman, jurtymyz tynysh bolsyn!
Hýrsand BERDIMURAT,
Kóktal meshitiniń ustazy.
