Birligi bekem eldiń bolashaǵy jarqyn
Dinimizdiń kóp toqtalatyn taqyryptarynyń biri – aýyzbirshilik. «Altaý ala bolsa, aýyzdaǵy ketedi» demekshi, kez kelgen qoǵamnyń baqytty ǵumyr keshýi úshin aldymen aýyzbirlik qajet. Birlik bar jerde baýyrlastyq, tynyshtyq, molshylyq, bereke jáne Allanyń rahymy bolatyny sózsiz.
Alla Taǵala «Álı Imran» súresiniń 103-aıatynda: «Alla tartqan jeliden (dinnen) bekem ustap, aıyrylmańdar. Allanyń ózderińe jasaǵan raqymyn eske alyńdar. Sender ózara jaý edińder, ol senderdiń júrekterińdi jaqyndatty. Sonyń raqymymen tabysyp, týystasyńdar. Sender tozaq apatynyń jıeginde tur edińder, Alla senderdi odan da qutqardy. Allanyń aıattary, mine, osy jaıdy baıandaıdy. Múmkin osyǵan oı jiberip, týra jolǵa túsersińder», – deıdi. Al, osy súreniń 105-aıatynda: «Aıqyn dálelder kelgen soń jikke bólinip, alaýyzdyq týǵyzatyndar bolsa, olar aýyr azapqa dýshar bolady», – dep eskertedi.
Iıa, qandaı qoǵam bolmasyn yntymaq-birliktiń arqasynda órkendep, adamdar bir-birine baýyrdaı qaraǵan kezde ǵana mamyrajaı zaman ornamaq. Sol sebepti de ardaqty Alla Elshisi (s.ǵ.s.): «Musylman musylman úshin bir-birin bekem ustap turǵan ǵımarat tárizdi», – dese, kelesi bir hadısinde: «Senderden biriń ózine qalaǵanyn baýyryna da qalamaıynsha, kámil musylman bolmaıdy», – deıdi. Paıǵambarymyz (s.ǵ.s.) jamaǵattan bólinip, qalys qalmaýyn árdaıym sahabalardyń esine túsirip otyrǵan.
Adamzat tarıhyna úńiletin bolsaq, birligi jarasqan elderdiń uzaq ǵumyr keship alpaýyt memleketke aınalǵanyn kóresiz. Al, birin-biri kóre almaı, bereke-birligin joǵaltqan elderdiń tarıh sahnasynan ǵaıyp bolǵanyna da kýámiz. Taýhıd senimin ózine tý etpegen, ózin elden erekshe sanaıtyndar ýaqyt óte ózine-ózi or qazǵanyn bilmeı qalady. Sol sebepti Alla Taǵala «Ánfal» súresiniń 46-aıatynda: «(Barlyq iste ) Allaǵa jáne onyń paıǵambaryna boısunyńdar. Ózara tájikelespeńder, áıtpese álsireısińder, boılaryńnan qýat qashady. Shydamdy bolyńdar. Alla shydamdyny jaqtaıdy», – dep buıyrǵan.
Taǵy bir hadısinde Paıǵambarymyz (s.ǵ.s.): «Musylman – musylmannyń baýyry. Oǵan (qııanat jasamaıdy) zulymdyq qylmaıdy, ony maqrum qaldyrmaıdy, ony tómen kórmeıdi. Bir kisige jamandyq retinde ony tómen kórýdiń ózi jetkilikti. Qandaı da bir musylmannyń maly, qany, ar-namysy basqa bir musylmanǵa haram etildi», – degen.
Paıǵambarymyz joǵaryda aıtqan hadısterimen bir qoǵamnyń tynyshtyǵyn, birligin, durys ómir súrýiniń jolyn kórsetken. Bul zańdylyqtar – qoǵamda ómir súrip jatqan árbir adamǵa júktelgen eń mańyzdy mindet. Islam sóziniń bir maǵynasy «yntymaq» degendi bildiredi. Sol sebepti musylman sózi tynyshtyq pen yntymaqta ómir súrip jatqan adam degendi bildiredi. Alla elimizdi tynyshtyq pen aýyzbirlikten aıyrmasyn!
Ibrgaım Smataev
«Áziret Sultan» meshitiniń naıb ımamy
