Baı bolýdyń 1 ádisi
Ábý Saııd ıbn Málık – on úsh jasynda ákesimen birge Ýhýd shaıqasyna qatysqan sahaba. Sol soǵysty ákesi sheıit bolady da, otbasynyń búkil aýyrtpashylyǵy jap-jas Ábý Saııdtyń moınyna túsedi. Kedeılikti bastan keshiredi. Ashtyqtan qaryndaryna tas baılap alatyn kezderi bolady. Sonda úıindegiler: «Bar da, Alla elshisinen (s.ǵ.s.) bir nárse surap kel! Jurttyń bári surap jatyr ǵoı» degen shaǵym mándes sóz aıtady. Alǵashynda barǵysy kelmeıdi. Biraq jaǵdaı qysyp bara jatqan soń, ne de bolsa, Alla Elshisine (s.ǵ.s.) baryp jolyǵýǵa bel baılaıdy.
Qudaıdyń qudiretin qarańyz, Rasýlýllanyń (s.ǵ.s.) qasyna baryp qalsa, ol halyqqa myna sózdi aıtyp tur eken: «Kóńilin toq tutqan jáne ar-namysty joǵary ustaǵan kisilerdi Alla Taǵala ózge jurttan baı etedi».
Osy sózdi estigen Ábý Saııd tilegin Paıǵambarymyzǵa (s.ǵ.s.) aıtpaı-aq úıine qaıtyp ketedi. Sodan keıingi jaǵdaıdy óz aýzymen bylaı dep jetkizgen: «Alla elshisinen (s.ǵ.s.) eshteńe suramaı úıge qaıtqan kúni Alla bizge ryzyq-nesibesin jiberdi. Sodan bylaı isimizge bereke daryǵany sonsha Ansarlardyń arasynda bizden baı eshkim bolmady...»[1]
Mine, bizdiń nesibe izdegende jasaıtyn úlken qatelikterimizdi biri osynda jatyr. Aınaladaǵy árkimniń dáýletine kóz tigip, men de solardaı bolsam ǵoı dep ishteı tilep júrýdiń ózi kóńildiń toq emes ekenin bildiredi. Onyń ornyna Allanyń maǵan bergen nesibesi ózime jetedi, Qudaıǵa shúkir deý kerek. Ekinshi másele – ar-namysty joǵary ustaý. Jurtqa alaqan jaıýdy namys kórýdiń ózi adamdy eńbekke baýlyp, tabysqa qaraı jetelese kerek. Abaı atamyz aıtqandaı, telmirgen kózimizdi emes, mańdaıymyzdan aqqan terimizdi satýymyz qajet. Sonda baı bolamyz. Alla elshisi (s.ǵ.s.) qatelespeıdi.
Asylbek Áýezhanuly
[1] Ahmad ıbn Hanbal. Músnad. III t., 449-bet
