BAQYTTYŃ KILTI

Burynǵy ótken zamanda bir patshalyq ómir súripti. Sol patshalyqty dáýreni júrip turǵan shaqta, hanzadasy ózin ylǵı da baqytsyz sanaǵan. «Baqyt» degen sezimdi seziný úshin bárin berýge daıyn bolǵan.

Qarapaıym kúnderdiń birinde oǵan patsha ýáziri kelip:

- Halyq arasynda bir dıýana bar. Jurt sony sóz etip júr. Soǵan baryp kór. Múmkin kómekteser, – dep aqylyn aıtty. Sol sózdi estı sala, ony izdep taýyp alady.

Hanzada dıýanaǵa kelip:

 - Dıýana, estýimshe sen baqytsyzdardy baqytty etedi ekensiń. Men bul patshalyqtyń hanzadasy edim. Ózimdi es bilgeli baqytsyz sezinemin. meni baqytty etshi, - deıdi.

Sonda dıýana:

 - Sen ózińdi baqytty etkiń kelse, baqytty jannyń jeıdesin kı. Sol kezde baqyttyń ne ekenin sezinesiń, - deıdi.

Bul sózdi estı sala, saraıyna oralyp «baqytty jeıdeni» izdeı bastaıdy. Ýázirden bastap, joǵarǵy laýazymdy, ásker basylardyń da jeıdesin kıip qarady. Joq, sezinbedi. Buqara halyq arasyndaǵy saýdagerlerdiń jeıdesin kıdi. Bári-bir báz baıaǵy qalpy. «Munym bolmas» dep, jer júzin aınalyp qaıtýǵa bel býdy. Basqa patshalyqtarda boldy. Keıbiriniń jeıdelerin satyp alyp ta kórdi.

Olardyń da esh paıdasy bomady. Nátıje bolmaǵannan keıin óz patshalyǵyna oralýdy jón kórdi. Saraıyna taıaǵan shaqta, qolynda soqasy bar, ózi kóńildi bir sharýany keziktiredi. Án salyp keledi. Ony hanzada sol mezette toqtatyp:

 - Sen baqyttysyń ba? – dep suraıdy.

Sharýa oılanbastan:

 - Iá!- dep qysqa ǵana jaýap qaıyrady. Buny estigen hanzada qýanǵannan:

- Onda maǵan jeıdeńdi satshy, - deıdi.

Sharýa:

- Mende jeıde joq, - dep kete barady.

 Aıtaıyn degenim, baqytty árkim ár qalaı baǵalaıdy. Biri baılyq dese, ekinshisi úshin otbasy. Úshinshiler bolsa, óz baqytyn ózgede dep oılaıdy... Óz baqytymyzdy ózgeden emes, ózimizden, óz júregimizden tabaıyq!

 G. Kenjebaeva