«Azdardyń» qatarynan qyla gór!

Musylmandardyń ádil ámirshisi Omar ıbn ál-Hattab (r.a.) bazar aralap júrse, bir er adamnyń: «Iıa, Alla! Meni quldaryńnyń ishindegi sol «azdardyń» qatarynan qyla gór! Iá, Alla meni sol «azdardyń» qatarynan qyla gór!» dep duǵa tilep otyrǵanyn kóredi. Aqyryn qasyna kelip: «Sen bul duǵany qaıdan aldyń?» – dep suraıdy.

Álgi adam:  «Alla óziniń kitabynda bylaı dedi emes pe: «Quldarymnyń ishinde shúkir etýshileri óte az»[1], -deıdi. Sonda Omar jylap jiberedi de ózin sógip: «Omardan basqanyń bári habardar ( bilgir)! Iá, Alla! meni de sol «azdardyń» qatarynan qyla gór!» dep jalbaryna duǵa jasaı bastaǵan eken.

Keıde sen keıbireýlerge «kúnáni tasta» deseń, olar: «Biraq, muny jalǵyz men emes, adamdardyń kóbi jasaıdy emes pe!» – dep, aqtalǵysy keledi. Alaıda sen «adamdardyń kóbi» degen sózdiń Quranda koldaný turǵysyna nazar aýdarsań, adamdardyń kóbi «bilmeıdi»[2], «shúkirshilik etpeıdi»[3] jáne «senbeıdi»[4] degen sózdermen sıpattalǵanyn baıqaısyń..

Al, eger sen «olardyń kópshiligi» degen sózge qarasań, «buzaqy»[5], «bilmeıdi»[6], «jaltarady»[7] jáne «tyńdamaıdy»[8] degen sózdermen ushtasqanyna kýá bolasyń. Sondyqtan sol «azdardyń» qatarynan bolýǵa tyrys.

Alla Taǵala Quranda bylaı deıdi: «Quldarymnyń ishinde shúkir etýshileri óte az»[9]. «Negizinde, onymen birge ıman keltirgen óte az ǵana edi»[10]. «Jánnat baǵynda nyǵymetke bólenedi, burynǵylardan kóbirek, sońǵylardan azyraq»[11].

Asa meıirimdi Alla Taǵala bizdi sol «azdardyń» qatarynan  bolýdy násip etsin!

[1] «Səbə» súresi,13-aıat.
[2] «Aǵraf» súresi, 187-aıat.
[3] «Baqara» súresi, 243-aıat.
[4] «Hýd» súres, 17-aıat.
[5] «Məıda» súresi, 59-aıat.
[6] «Ənǵam» súresi, 111-aıat.
[7] «Ənbııa» súresi, 24-aıat.
[8] «Ənfal» súresi, 21-aıat.
[9] «Səbə súresi,13-aıat.
[10] «Hýd» súresi, 40-aıat.
[11] «Ýaqıǵa súresi, 12-14 aıattar.