AShAMAIǴA MINGIZÝ

Ul bala qara taban bolyp jetige deıin jerden jeıtin taıaǵynan qutylyp, kez kelgen qýraı men shybyqty at qyp aınala shaba bastasymen ózi quralpy qyzdardan bóline bastaıdy. Esil-derti túzge, malǵa aýady. Al qyzdar kóbelek qýyp, qýyrshaq jasap, sulý kóriniske úıir bolyp, úıden uzamaýǵa tyrysady. Qashan da "mal, maldy alǵan soń al" dep taǵdyryn malǵa súıeıtin qazaqqa osy maldy baǵý úshin bala kerek.

Bala bolǵanda - UL.

"AShAMAI" - erdiń qarapaıym túri. Aǵashtan jasalady. Keńdigi balanyń aýyna laıyq. Aldy-artynda erdiń qasy sekildi súıenishi bar. Úzeńgisi joq. Ústinde jumsaq kópshigi bolady. Osyny jýas atqa erttep, ústine balany mingizedi. Aýyl qalmasyn dep basynda eki aıaǵyn baılaıdy. Sonan soń tizgindi balaǵa ustatyp, bireý atty aldymen arqan boıy jerge, onan soń onan alysqa jetekteıdi. Sóıte-sóıte balanyń ózi júredi. Bir-eki kúnnen soń aıaqty baılamaıdy.

Bala óz betimen júredi. Sodan aınalasy bir jetiniń ishinde atqa jaqyndyq qanynda bar qazaq balasy ashamaıdy tastap, er-toqymǵa minedi.

Úzeńgige aıaǵy jetpese taralǵyǵa salady.

Ómiriniń qaq jartysy attyń ústinde ótip,

aýy erde tozatyn, qaısar qazaq alǵash atqa otyrǵan kezde "AShAMAI TOIYN" jasaıdy.

Bul toı ár áke-shesheniń shama-sharqyna qaraı bolady. Baılar iri qara soıyp kádimgideı toı jasaıdy. Kedeıleri búıregi biteý, ultabary tolatyndaı maıy bar laǵyn soıyp, kórshilerine yqylas tanytady. Áýlettiler kúzde bıe aǵytyp, sirge jııar bergende bir qulynǵa en salyp, ashamaıǵa mingen balasyna básire ataıdy. Joqtar qolyndaǵy bir bıesiniń qulynyn aldyn ala atap qoıady.

Qazaq úshin aldymen ashamaıǵa, artynan taı-qunanǵa miný at jalyn tartty degen sóz.

At jalyn tartty degen sóz - azamattyqtyń bastamasy. Óıtkeni qazaq balasy udaıy jaýgershilikte óskendikten be, álde kóshpeli ómirdiń ózi qalyptastyra ma ómirge erte beıimdeledi.

Erte úılenedi. Mal sońyna erte ilesedi. Bul tirshiliktiń bári qazaqta atpen bitedi. Sondyqtan ashamaıǵa mingizý erekshe atalady. Osy ashamaıǵa mingennen bastap at qulaǵynda oınaý, kebenek kıip eldiń sheti, borannyń ótine shyǵý,

saýyt kıip, sadaq ustap jaýmen shaıqasý, bári-bári ashamaıǵa minýden keıingiler.

Ashamaıǵa balany mingizip, kórshi-qolań, jaqyn-jýyq jınalǵanda burynǵy danalardyń kósem sózderi kóp aıtylady.

Osal ynjyqtarǵa uqsamasyn dep úlkender balaǵa bata beredi.