ASAN QAIǴYDAN EKI SÓZ

Asan Qaıǵy jolaýshylap kele jatyp, bir sarańnyń úıine túsipti. Sarań úıime qonady dep qorqyp, teris qarap otyryp aıran quıypty. Aıranyn iship bolǵan soń, Asan Qaıǵy:

«Adam bir kórgende jylan,

Eki kórgende qulan,

Úsh kórgende adam.

Myrza beri qarap otyryńyz, manadan beri jylansha otyrdyq, endi qulansha otyryp jón suraıyq, sodan keıin adam bolýdy da oılasamyz» depti.

 

***

 

Uzatylyp bara jatqan qyzy kórisýge kelgende, Asan Qaıǵy:

- Súıýge bar balam, súıgenińe joq balam. Qulannyń órisi birge, jýsaýy basqa degen. Jat jurtqa jaralyp ediń, endi bólek jýsaǵaly tursyń!-degen eken.

 

ÁIELDI QORSYNBAŃDAR

 

Alys joldan úı ishin saǵynyp kele jatyp, aýylyna jaqyndaǵanda Syrym joldastaryna:

- Qattyraq júrińder, búgin aýylǵa jete qonaıyq,-deıdi. Syrymnyń áıeli ajarsyzdaý adam eken. Sony ázildep joldastary Syrymǵa estirtpegen bolyp:

- Basqa kisi asyqsa durys, al osy Syrym qaı ádemi áıeline asyǵyp keledi eken?!-depti.

Bul sózdi qulaǵy shalyp qalǵan Syrym:

- Jigitter, áıeldi qorsynbańdar,

Áıelsiz úıge kúı bitpeıdi.

Qoıdy «qoı» dep qomsynbańdar,

Qoısyz elge úı bitpeıdi.

Astymdaǵy qara atym – tulparym,

Qasymdaǵy qara áıelim – suńqarym,-dep jele jónelgen eken.