ÁRÝAQ TÝRALY BIR AÝYZ SÓZ
Siz árýaqty qalaı túsinesiz? Allanyń qasyna árýaqty "serik" etip,dindi qıyndatýdyń ne qajettili bar? "Jurttyń bári árnárseni bir aıtyp, shatasyp jatqanda "Alladan basqaǵa ǵıbadat etpeımin" dep turyp alsam qatelespeımin ǵoı" deıtin oıdyń kimge de bolsyn keletini kúmánsiz.
Eger másele dál osylaı op-ońaı sheshimin taýyp kete berse, onda teologııa ǵylymy ómirge kelmes edi. Sonda álgi oıda qandaı jańsaqtyq bar? Paıǵambarlardyń kelýdegi maqsaty Alladan basqa syıynýǵa laıyq eshnárse joq ekendigin uǵyndyrý emes pe? Endi osy aıtqanymyzdy saralap kóreıik.
Eń basty qatelik, paıǵambarlardyń kelý maqsatyn túsinbeýden týyndaıdy. Bilgen jón. Eshqandaı paıǵambar jańa din ákelmeıdi. Olar jańa din ákeldi degen túsinik talaı qaýymdy dinnen shyǵaryp jiberdi. Eger ár paıǵambar jańa din ákele berse, onda olardyń senimi de árqıly bolǵan bolar edi. Dindarlar paıǵambarlardyń kelýin dinniń, qasıetti kitaptardyń burmalanyp, ózgeriske túsýinen dep túsindiredi. Biraq nege ózgeriske túsetinine jete mán bere bermeıdi.
Basyn ashyp aıtaıyq. Paıǵambarlar burynnan bar dinge jan kirgizý úshin keledi. Din óli bolǵan soń qasıetin joǵaltady, jansyz nárse kim kóringenniń qoljaýlyǵyna aınalady. Jansyz, rýxsyz nársege Alla nazar salmaıdy. Bolmasa "eski" dindegiler de Allaǵa senemin, tek soǵan ǵana qulshylyq etemin ( evreılerdi qaperge alyńyz) degen oıdan aınyǵan joq.
Mine, biz sóz basynda aıtqan "Bir Allaǵa ǵana ǵıbadat etemin" degen adam sol eski, jansyz, rýxsyz dindi mise tutyp jurgen adam sııaqty.
Uǵynyqtylyq úshin taǵy bir oı qosaıyq. Álgi "Bir Alla" dep júrgen adam men "árýaqshyl" dindár qatar otyryp namaz oqydy delik. Quranda aıtylatynyndaı, bireýiniń namazy qabyl bolady da ekinshisinińki óz boıynan joǵary kóterilmeıdi. Árıne, biz "árýaqshyldy" durys dep qabyldaımyz. Sonda "Alla" dep otyrǵan adamda ne jazyq?! Saýaldy osylaı qoıǵanda, evreıler men xrıstıandardy aıtpaǵanda teris 72 baǵytqa burylyp ketti delinetin musylmandarda ne jazyq?!
Jalǵyz ǵana kinárat bar. Ol - árýaqty moıyndamaý. Buryn da aıttyq. Taǵy da qaıtalaıyq. "Alla" degendi seni ózine táýeldi etip alǵan "Men" aıtyp otyr. Al ózin árýaqqa tapsyrǵan adam aıtqan Allany "Ol" aıtyp otyr. "Ol" - seniń janyń, "Ol" - antımaterııa, "Ol" - monada. Ony bul kúnde ǵylymnyń ózi dáleldep otyr. Seni, meni, myna 18 myń álemdegi kórinip turǵan, kórinbeı turǵan materııa men ony túzetin barlyq bólshekterdi alyp tastasaq, qalatyny - árýaq.
Endi joǵaryda aıtqandarymyzǵa mán bereıik. Álgi men "Alla" dedim, "namaz oqydym", "Allaǵa serik qosqan joqpyn"dep otyrǵan adam da biz alyp tastadyq degen materııamen birge joq bolyp ketedi ǵoı. Sonda sol joq bolyp ketetin adamnyń oqyǵan namazy da ózi esitetin bıiktikten ári kóterile almaýy zańdylyq qoı. Al árýaq (antımaterııa, rýx, monada - atynda turǵan dáneńe joq) udaıy "joqtyqta" turady. Al Alla - barlyqta. Biz muny kálıma shaxadat aıtý arqyly aıǵaqtaımyz. Sondyqtan "Alla" dep ózińdi barlyqta turmyn dep aıtsań, sen de Allaǵa aınalyp, sypaıylap aıtsaq Jaratýshy ıemizge "shırk" qosyp shyǵa kelesiń. Al "árýaq" deseń joqtyqqa ótesiń. Ol "joqtyq" Allanyń sıpattary arqyly myna álemdi bar sııaqty etip kórsetedi. Sol aýanı kóriniste jasalǵan "ǵıbadattarǵa" senim artý - búgingi dinı aýytqýshylyqqa alyp keldi. Ony búgingi ǵylym da dáleldep otyr. Biraq soǵan nazar aýdaryp jatqan dindárdi baıqamadym.
Qudııar BILÁL
