AQYRETTIŃ BAR BOLÝY MEN MÁŃGI BOLÝYNYŃ HIKMETI

قَالَ رَسُولُ اللهِ صَلَّى اللهُ عَلَيْهِ وَسَلَّمَ: كُلُّ امْرِئٍ فِي ظِلِّ صَدَقَتِهِ حَتَّى يُقْضَ بَيْنَ النَّاسِ. (الجامع الصغير)

Paıǵambarymyz (s.a.ý) bylaı deıdi: «(Qııamet kúni) adamdarǵa úkim berilgenge deıin árbir kisi bergen sadaqasynyń kóleńkesinde bolady». (Sýıýtı, ál-Jamıǵ ýs-caǵır)

Alla Taǵala – ejelden bar, máńgilik, al qudireti sheksiz. Ár isinde sansyz hıkmetter bar. Onyń jaratýshylyq sıpaty árdaıym bola bermek, ol jaratqan jáne jaratatyn nárseleriniń bir bóligi jalǵasa beredi. Myna bizdiń álemimizdi budan qansha ǵasyr buryn jaratqanyn eshkim bile almaıdy. Al sosyn myna álemde ǵıbadat, mindet júktelgen tańdaýlylar sanatynan adamdar jaratqan. Búkil osy adamzat jáne basqa jaratylǵan nárseler qur bekerge jaralǵan ba? Belgili bir ýaqyt ómir súrip, sosyn tolyq joıylsyn dep osyndaı ǵajap úlgide jaratylǵan ba sonda? Joq, joq! Mundaı oıǵa adamnyń ojdany kelispeıdi. Buǵan árbir usaq-túıekte kórinetin hıkmet órnegi de qaıshy keledi.

Sóz joq, adam myna dúnıege synaq úshin kelgen. Bul álemdegi kórkem ne teris amaldarynyń nátıjesine basqa álemde máńgige qaýyshýy úshin jaratylǵan. Myna dúnıede jurttyń bári óz isiniń jemisin tıisti dárejede kóre almaıdy. Nebir salıh, qadirli adamdar zábir kóredi, japa shegedi. Al nebir azǵyn, ázázilder molshylyqta ómir súrip, jaman isiniń jazasyn (myna dúnıede) kórmeıdi. Sondyqtan, ıláhı ádildik tolyq ornaıtyn álem bar. Ol jerde bári tegis amaldarynyń tolyq qarymyna qaýyshady.

Mynany da oılap qoıý kerek; bul dúnıede adamdar men basqa mindet júktelgen bolmystar eki túrge jiktelgen:

Bir bóligi mindetin oryndaýda. Soǵan oraı, olardyń qaıyrymy aqyret áleminde máńgilik bolady.

Al ekinshi jartysy mindetine qııanat jasaǵandar. Rabbylaryn umytyp, óz qulqyna tabynyp, adasqan baǵyttarynan eshqashan aınymaıdy, mıllıardtaǵan jyl ómir súrse daǵy, óz senimin, teris jolyn tastamaýǵa kúsh salady. Sondyqtan olardyń jazalary da olardyń senimderi sekildi buljymaıdy, olar aqyrette máńgilik azap tartady.