ÁŃGIMENIŃ SABAǴY
Oqıǵa mıqaınatar ystyq ólkede bolsa kerek. Bir derevnıaǵa syrttan bir saýdager kelip, ár maımyldy 10 dollardan satyp alatynyn málimdepti. Toǵaıda maımyldyń órip júretinin biletin aýyl halqy sharýasyn tastaı salyp, jappaı maımyl aýlap ketedi. Saýdager árqaısyna 10 dollardan tólep myńdaǵan maımyl satyp alady. Ormanda maımyl azaıyp, ony ustaý da qıyndaı bastaǵan tusta saýdager naryqty qyzdyryp, maımyl baǵasyn 20 dollarǵa deıin kóteripti.
Esi shyqqan el kúndiz kúlki, túnde uıqyny umytyp, taıly-tuıaǵy qalmaı orman kezip ketedi. Kóp uzamaı derevnıada azyq azaıyp, ashqursaq halyq amal joq egis dalasyna orala bastaıdy. Sol kezde saýdager maımyl baǵasyn 50 dollarǵa ósiredi. El ne táýekelge baryp maımyl aýlaýdy, ne aýylsharýashylyǵymen aınalysa berýdi bilmeı.., biraq 50 dollar týraly oılaǵan saıyn, kóz aldynda bekerge sý bop aǵyp jatqan baılyq elestep, ne isterin bilmeı, basy dań bop júrip jatady...
Sol shamada saýdager shuǵyl sharýalarmen qalaǵa ketetin bop, ornyna orynbasar etip óz adamyn qoıyp ketedi.
Orynbasar álgi saýdager qojaıynyna qaraǵanda aqkóńildeý ári darhandaý jigit eken.., tez baıyp ketkisi keletin jurtqa qora-qora maımyldy nebary 35 dollardan satyp alýǵa astyrtyn usynys jasaıdy.
- Ýa, halaıyq! - deıdi, orynbasar, - Myna myńǵyrǵan maımyldardy kórip tursyzdar. Ózderińiz bul maqulyqtardy qalaı aýlaǵandaryńyzdy da umyta qoıǵan joqsyzdar...
Meniń usynysym - qojaıyn qaladan kelgenshe osy maımyldyń birin qaldyrmaı, 35 dollardan satyp alsańyzdar, ol kelgen soń, ár maımyldy 50 dollardan ózine satyp.., bir túnde baıyp shyǵa kelmeısizder me?!.- deıdi.
Kókten izdegeni dál aıaǵynyń astynan tabylǵan qara tobyr jany qalmaı, júgirip júrip (biri jerin, biri úıin satyp, bankke kepilge kirip) myńǵyrǵan maımyldy bir-aq kúnde talap áketedi. Sóıtip, derevnıa jurty qas pen kózdiń arasynda 700 myń dollarǵa saýda jasaıdy...
- Alaıda, sol kúnnen bastap aýyl adamdary, jer tyrmalap óz kúnin ázer kórip otqan qara tobyr saýdagerdi de, onyń orynbasaryn da kórmepti deıdi. Esesine, ár úıde qyrýar myń dollar qaryz ben túkke qajeti joq, shyńǵyrǵan maımyldar ǵana qalypty :
BUL ÁŃGIMENIŃ SABAǴY: ár nársege elite bermeı, «tez baıýdy emes, jyldam kedeı bop qalmaýdy esten shyǵarmańyz!» degendi meńzeıdi eken.
Bizdiń keıbir saýatsyz ermegúlderdiń tirligine uqsaıdy eken. Jarqanattyń uıasyn izdep ketkenderge. Eski tońazytqysh, eski gır izdep, esek izdep, kórshisiniń esegin urlap satyp baıyp ketemiz dep, sol úshin qyrylǵandardy da umytqan joqpyz áli....
Qanat Eskendir
