AMALDYŃ EŃ QAIYRLYSY UDAIY JASALǴANY
Paıǵambarymyz (s.a.ý.) bylaı deıdi: «Aqyldy adam, nápsin esepke tartqan jáne ólimnen keıingi (ómir) úshin tyrysqan kisi». («Súnán Termızı»)
Aısha anamyz (r.anha) aıtady:
«Paıǵambarymyz (s.a.ý.) keıbir aılarda kóp oraza tutatyn. Tipti biz ony (s.a.ý.) osy aıda úzbeı oraza tutty dep oılaıtynbyz. Keı aılarda az oraza tutatyn. Ol kezde biz osy aıda esh oraza tutpady dep oılaıtynbyz. Paıǵambarymyzdyń (s.a.ý.) Ramazan aıynan basqa aılarda orazany otyz kúnge toltyrǵanyn kórmedim».
Bir hadıs sháripte bylaı deıdi: «Bul (Shaǵban aıy), Rejep pen Ramazan aıynyń arasyndaǵy aı. Adamdar muny umytyp jatady. Alaıda bul aıdaǵy amaldar álemderdiń Rabbyna jetkiziledi. Al men amalymnyń orazaly kúıde barýyn qalaımyn».
Paıǵambarymyz (s.a.ý.): «(Nápil) ǵıbadattardan shamalaryń keletinin tańdańdar. Sender qulshylyqtan jalyqpaǵansha Alla Taǵala da senderge saýap berýdi úzbeıdi» degen.
Hadıs sháripte «Shamalaryń keletin amaldy tańdańdar» delingen. Iaǵnı nápilderden ózderińe jeńil bolǵanyn, nápsileriń jalyqpaı, shynaıy jasaıtyn amaldy tańdańdar. Óıtkeni jalyǵý, zerigý qulshylyqtyń saýabyn azaıtady.
Sender amal jasaýdy toqtatpasańdar Alla Taǵala da senderge saýap berýdi, syıapatyn eselep jazýdy toqtatpaıdy. Sender azǵantaı bolsa da udaıy izgi amal jasasańdar úzdiksiz saýap jazady. Biraq jalyǵyp, zerigip amaldy kem jasasasańdar saýaptaryń da kemı bastaıdy. Az bolsa da udaıy jasalǵan amal kóp bolyp, jalǵasyn tappaǵan amaldan abzal. Ári amaldy úzbeı jasaý Paıǵambarymyzdyń (s.a.ý.) súnnetine uıý bolyp tabylady.
Paıǵambarymyzdyń (s.a.ý.) kózinde eń súıikti namaz az bolsa da udaıy, ádetke aınaldyrylǵan namaz edi. Paıǵambarymyz (s.a.ý.) qandaıda bir (nápil) namaz oqýǵa bastaǵanda ony ádetke aınaldyratyn.
