Alla quldaryn osylaı da synaıdy

Ardaqty sahaba Ábý Hýraıra (r.a.) Alla Elshisiniń (s.ǵ.s.) bylaı dep aıtqanyn jetkizedi. Bir kezderi Alla Taǵala Israıl urpaqtarynan alapespen aýyrǵandy, basy taqyr tazdy jáne soqyrdy osy úsheýin synamaq úshin olarǵa bir perishteni jiberedi.

Perishte alapespen aýyrǵanǵa keledi de odan: «Sen bárinen de neni qalaısyń?» – dep suraıdy. Ol: «Men aýrýymnan jazylyp, kelbetimniń túsi kirip, terimniń ońalýyn qalaımyn», –deıdi. Sonda perishte onyń denesin qolymen sıpap, ol búkil aýrýynan jazylyp, kelbetine tús enip, terisi ońalady.

Sodan soń perishte: «Saǵan dúnıeniń ishinen ne unaıdy?» – dep suraıdy. Sonda ol: «Túıeler (ne sıyrlar)», – dep jaýap beredi. Oǵan býaz túıe berilip, perishte: «Alla ony saǵan ıgilikti etsin!» – dep duǵa aıtyp ketedi.

Sosyn perishte basy taqyr tazǵa kelip: «Sen bárinen de ne qalaısyń?» – dep suraıdy. Ol: «Men aýrýymnan jazylyp, jaqsy shashty bolýdy qalaımyn», – dep jaýap beredi. Sonda perishte onyń denesin qolymen sıpap, ol báz baıaǵy qalpynsha shashty bolyp shyǵa keledi.

Sodan soń perishte: «Saǵan dúnıeniń ishinen ne unaıdy?» – dep suraıdy. Sonda ol: «Sıyrlar», – dep jaýap beredi. Sonymen oǵan býaz sıyr beriledi. Perishte: «Alla ony saǵan ıgilikti etsin!» – dep oǵan da duǵa aıtyp ketedi.

Sosyn perishte soqyrǵa kelip: «Sen bárinen de ne qalaısyń?» – dep suraıdy. Ol: «Alla meniń janarymdy qaıtaryp, adamdardy kórsem» – dep jaýap beredi. Sonda perishte ony qolymen sıpaǵanda Alla onyń kózine nur berip janary kiredi.

Sodan soń perishte: «Saǵan dúnıeniń ishinen ne unaıdy?» – dep suraıdy. Sonda ol: «Qoılar», – dep jaýap beredi. Sonda oǵan býaz qoı beriledi. Osydan keıin olardyń maldary kóbeıip birinde bútin tabyn túıe, ekinshisinde bútin tabyn sıyr, al úshinshisinde úlken qora qoı bolady. Sodan soń perishte burynǵy alapespen aýyrǵanǵa, sonyń burynǵy túrine (ıaǵnı alapespen aýyrǵan adamnyń túsine) enip keledi de: «Men – kedeımin, jolda búkil dúnıemnen aıryldym. Búgin Alladan basqa, odan keıin senen basqa suraıtyn eshkimim joq. Saǵan jaqsy kelbetti túr men teri bergen jáne baılyq bergen Allanyń atymen suraımyn, maǵan saparymdy aıaqtaýym úshin bir túıe bershi», – deıdi.

Álgi adam: «Meniń qaryzym kóp», – dep oǵan eshteńe bermeıdi. Sonda perishte odan: «Men seni biletin sekildimin. Sen emes pe aýrý bolyp, adamdar qashatyn jáne sen emes pe kedeı bolyp ony Alla baıytqan?» – dep suraıdy. Sonda ol: «Rasynda, bul baılyq, meniń ata-babalarymnyń qaldyrǵan murasy», – dep jaýap beredi. Sonda perishte: «Eger sen ótirik aıtsań, onda Alla seni baıaǵy qalpyńa keltirsin!» – dep duǵa aıtady.

Sosyn perishte buryn shashy joq taz bolǵanǵa, sonyń burynǵy keıpinde kelip, oǵan bunyń aldyndaǵy burynǵy alapespen aýyrǵanǵa aıtqanyn aıtady. Al ol bolsa dál sonyń bergen jaýabyndaı jaýap beredi. Sonda perishte oǵan da: «Eger sen ótirik aıtsań, onda Alla seni baıaǵy qalpyńa keltirsin!» – dep duǵa aıtyp ketedi.

Sosyn perishte buryn soqyr bolǵanǵa, sonyń burynǵy keıpine enip keledi de oǵan: «Men kedeımin, jolda búkil dúnıemnen aıryldym. Búgin Alladan basqa, odan keıin senen basqa suraıtyn eshkimim joq. Saǵan seniń janaryńdy qaıtarǵan Allanyń atymen suraımyn, maǵan saparymdy aıaqtaýym úshin bir qoı berseń jetkilikti bolar edi», – deıdi. Ol: «Rasynda men soqyr boldym, al Alla meniń janarymdy qaıtardy, ne alǵyń kelse al, neni qaldyrǵyń kelse, qaldyr jáne Allanyń atymen ant etemin, Uly Alla Taǵala úshin búgin menen ne alsań da, senen ony qaıtaryp berýińdi talap etpeımin!» – deıdi.

Sonda perishte: «Dúnıeńdi ózińe qaldyr, rasynda Alla senderdi synady da, Alla saǵan rıza boldy, al seniń eki joldasyńa ashýlandy», – deıdi[1].