ADAMGERShILIKTEN EKI ALMAŃDAR!..
1. Jýyrda men býkınıstke bas suqtym. Bala kúnimde urlanǵan bir kitap bar edi. Dál sondaı kitapty kózim shaldy. Kózime ottaı basyldy. Sodan satyp aldym. Úıge ákep paraqtap otyrsam, týra óz kitabym. Birinshi betinde ózimniń aty-jónim jazylǵan. Kitapty atam syılaǵan. Syılaǵan kezde jazǵan tilegi de sol qalpynda tur. «Kóp jyldan keıin bul kitap qaıtyp qolyńa túsip, sen ony oqyp shyǵarsyń dep úmittenem» dep jazypty. Úmiti aqtaldy.
2. Úsh apta buryn men biraz kıimderimdi úısiz adamdarǵa taratyp edim. Búgin saıabaqta ketip bara jatyp meniń jempirimdi kıip alǵan bir áıeldi kórdim. «Ádemi jempir eken!» dedim. Ol da rıza qalpynda maǵan kúlimsirep qarap, «Iá, maǵan da unaıdy» dep jaýap qatty.
3. Men sýsamyrǵa shaldyqqaly biraz ýaqyt boldy. Eki jyl buryn anam qaıtys bolǵaly onyń mysyǵyn úıge alyp kelgem. Jýyrda tún ortasynda oıanyp kettim. Mysyǵym aıaǵyma shyǵyp alypty. Mııaýlap otyr. Buryn sońdy bulaı istegenin kórmeppin. Ne bop qaldy eken dep ornymnan turaıyn desem, qatty álsiregendikten tura almadym. Glıýkometrimdi alyp qannyń quramyndaǵy glıýkozanyń deńgeıin ólshedim. 53-ke túsip ketipti. Qalypty deńgeı 70-120 aralyǵy. Keıin aýrýhanada dáriger mysyq ýaqtyly oıatpaǵanda sol kúıi oıanbaı kete beretinimdi aıtty.
4. Búgin onyń aýrýhanada jatqanyna 127 - kún bolar edi. Men ol komaǵa túskeli barlyq 126 kún boıy janynda otyrdym. Túnde túsimde ol ólip qalypty. Tańerteń men onsyz qalaı kún kórer ekenmin degen sýyq oı sanamdy sharpyp ótti. Sol kezde telefon shyryldady. Ol eken.
5. Erteńgisin ámııanymdy joǵaltyp aldym. Sálden soń esigimdi bógde bir kisi qaqty. Ámııanymdy taýyp alǵanyn aıtyp, ákep berdi. Qýanǵanymnan ishindegi 200 dollardy usyndym. Ol maǵan osynyń jartysy da jetedi dep júzin aldy. Tańerteń ózi de dál osylaı ámııanyn joǵaltqanyn aıtty. Sondyqtan jartysyn alýym ádiletti bolar dedi. Sóıdedi de ketti. Biraz ýaqyttan soń qaıtyp keldi. Meniń aqshamdy qaıtyp alyp kepti. Óıtkeni, basqa bir áıel onyń ámııanyn taýyp ákep beripti. Ishindegisi sol qalpynda dep qýanyp tur.
6. Tańerteń jolda bir áıeldiń dóńgelegin aýystyryp berýge toqtaǵan edim. Túste sol áıel meni qyzylǵa ótip bara jatqan kóliktiń astyna julqyp tartyp, aman alyp qaldy.
7. On bes jyl boıy bala tárbıesi jónindegi keńesshi bolyp istegen edim. Kóp jyl ótken soń ózimniń bir shákirtimmen kezigip qaldym. Bala kúninde minezi qıyn edi. Únemi ashýshań, ómirge kóńili tolmaıtyn óziniń. Bir kúni kóńilin tabaıyn dep oǵan sýpermenniń sýretin salyp berdim. Sýper qaharmandar eshqashan moıymaı, árdaıym jeńistiń týyn bıikke qadaıtynyn aıttym. Qazir ol órt sóndirýshi eken. Jarty saǵat ótken-ketkendi aıtyp sóılestik. Qoshtasar sátte qoınynan ámııanyn alyp, ishinen men salyp bergen sol sýpermenniń sýretin alyp kórsetti. Áli kúnge deıin saqtap júr eken...
8. Búgin jumysqa shyǵatyn kúnim. Kóp ýaqyttan beri múgedektigime baılanysty úıde otyrǵan edim. Men jumys isteıtin zaýytta qatty jarylys bolyp, meniń eki qulaǵym da sańyraý bolyp qaldy. Qaıta oralýym men úshin naǵyz mereke boldy. «Sizben qaıta qaýyshqanymyzǵa qýanyshtymyz!», «Sizdi saǵyndyq!», «Qosh keldińiz!» degen jazýlardy ustap aldymnan shyǵyp qarsy alǵan áriptesterime dán rıza boldym. Janymda isteıtinderdiń toǵyzy men úshin arnaıy ymmen túsinisýdi meńgeripti. Menimen sóılesý úshin.
Aýdarǵan Shynar Ábildá
