ADAM ÓZ ÁLSIZDIGIN MOIYNDAǴANDA...
Adam áýeli óziniń álsiz pende ekenin moıyndaýy kerek. Moıyndaý – ózińniń shynaıy bolmysyńdy qabyldaý. Qabyldaý bar jerde shynaıylyq bar, jeńildik bar. Sondaı-aq, álsizdigin moıyndaǵan adam basqa adamdardyń da qate jasaýǵa haqysy bar ekendigin túsingendikten keshirimshil keledi.
Kitaptyń bul taqyrybyn Ystambulda saparda júrip jazdym. Janymda Sanat degen týǵan inim bar.
Ystanbuldaǵy jumysymyzdy bitirip, áýejaıǵa kelgen betimiz. Júkti rettep jatyp, noýtbýgymdy sómkemnen tappadym. Qonaqúıde qalyp qalypty. Men bir sharýalarǵa aınalǵanda,tis pasta, shetkama deıin qaldyrmaı chemodanyma salyp, júgimdi rettegen Sanat inim bolatyn. Noýtbýgymdy umytyp salmaǵany úshin aǵalyq nazben Sanatqa birdeńke dep renjı bastaǵanym sol edi, kúni keshe ǵana ózim jibergen qatelik esime sap ete túse qaldy da kilt toqtadym.
Oqıǵa bylaı bolǵan edi. Úsh kún buryn Ystambulǵa jetip, áýejaıda júk kútip otyrǵan jerimde bar aqsham salynǵan shaǵyn qol sómkemdi umytyp ketip, qara basqanmyn. Sómkeniń qalyp qoıǵanyn qalanyń qaq ortasynda bir jerge aıaldaǵanda ǵana baıqap, áýejaıǵa qaıta barýǵa týra keldi. Qalanyń keptelisimen áýpirimdep áreń degende áýejaıǵa jetip, sómkeni tapqansha birneshe saǵatymyz bosqa ketip, silikpemiz shyǵyp ábden sharshaǵan bolatynbyz. Osynshama áýrege salsam da Sanat inim “sómkeńiz tabylady, áýejaıda eshbir zat joǵalmaıdy. Jan-jaqtyń bári kamera” dep keshe kóńilimdi aýlap, meni jubatyp edi, endi jiberip qoıǵan qateligi úshin meniń oǵan renjıin dep turǵanym qalaı?
Sonda maǵan qatelik jasaýǵa bolady da, basqalardyń qatelesýge qaqysy joq pa?? Birden táýbeme keldim.
Ystanbul áýejaıy óte úlken. Biraz júrip ushaǵymyz ushatyn esikke kelip, bos oryndyqqa jaıǵastym. Áli qalyń oı ústinde otyrmyn. Estelikter meni talaı jyl burynǵy taǵy bir oqıǵaǵa jetektep apardy.
Birde otbasymyzben Almatydan Astanaǵa qydyryp kelgenbiz. Ushaq bıletterin men alǵanmyn. Qaıtatyn kúni 22:30 áýejaıǵa kelip, júgimizdi tapsyrǵaly jatyr edik, sondaǵy qyzmetshi qyz “sizderdiń ushaq ushyp ketkenine jarty saǵat boldy” demesi bar ma? Men qalaısha, ushý ýaqyty 23:30 emes pe? dedim tańǵalǵan boıda. Mine dep telefonnan bıletimdi kórsetip jatyrmyn. Bıletke úńilgen qyzmetshi qyz 23:30 ushý ýaqyty emes, Almatyǵa jetý ýaqyty ǵoı dep túsindirdi. Sóıtsem men burynyraqta bir jerden estigen Almatydan Astanaǵa sońǵy reıs 23:30 degen aqparat mıymda turǵandyqtan, sony izdep bıletke úńilgenmin ǵoı. 23:30 degendi kózim shalǵannan keıin bıletke anyqtap qaramaǵan ekenmin.
Amal joq, bılettiń bári kúıdi. Ertesine qaıtadan qymbat bılet alýǵa tura keldi. Áıelim men balalar meni jubatqan boldy. Al men ishimnen “eger basqa bireý osylaı qatelik jasasa, men kem degende kózińdi ashyp, durystap qaramaısyń ba degendeı sózdermen kóńilderine qoıaý salar edim ǵoı“ dedim kúbirlep.
Iá, adam óz álsizdigin moıyndaǵanda basqalarǵa da túsinikpen qarap, keshirimdi bolýdy úırenedi.
