ÁBÝ NASYR ÁL-FARABIDIŃ «ULY DUǴASY»
(«Dýǵa ýl-ǵazım» («du،gaa ul-aziim»):
Bıssmıllahı ar-Rahman ar-Rahım!
1) Eı, Qajetti bolmys! Jaratylǵandardyń Jaratýshysy! Sebepterdiń Sebebi! Basy da, sońy da bolmaǵan Ázálı (Máńgi) Allam! Meni qatelikterden saqtap, Óziń razy bolǵan amaldardan úmitti etýińdi Senen suraımyn!
2) Eı, Allam! Maǵan barlyq maqtaýly, jaqsy qasıetterińdi bere gór! Isterimdi jaǵymdy nátıjelermen rızyqtandyr! Maqsattarym men talaptarymdy sátti ete gór! Eı, (búkil álemniń) shyǵys pen batystyń Iesi!
Ǵaryshtaǵy ózendershe tasyp aqqan jeti juldyzdyń (ǵalamshardyń) Rabbysy! Olar ıgiligimen (jaqsylyǵymen) búkil jaýhardy qorshap turǵan Allanyń qalaýymen óz isterin atqarýda. (Biraq) Satýrnge, Iýpıterge, Merkýrııge de kúmánim bar (olardan kútpeımin)! Barlyq qaıyrdy tek Senen tileımin!
3) Allam, meni kórkem (jaqsy) kıindire gór! Paıǵambarlardyń keremetterin, aýqattylardyń baqytyn, hákimderdiń ilimin, taqýalardyń taqýalyǵyn bere gór!
4) Eı, Allam! Meni baqytsyzdyq pen joqshylyqtan, joq bolýdan saqtaǵaısyń! Meni shynshyldar men sháhıd bolǵandarmen birge taza aǵaıyndylardan, adaldyq ıelerinen jáne kóktiń turǵyndarynan ete gór! Senen basqa Táńir joq, Alla! Jer men kóktiń Nury, barlyq zattardyń sebebi – Sensiń! Maǵan sanaly (áreketshil) aqyldan bir aǵylý, tasý (faıd, Emanatsııa) ber!
Eı, asa Uly ári Meıirimdi! Rýh-nápsimdi hıkmettiń (danalyqtyń) nurymen nurlandyryp, túzete gór! Igilik-nyǵmetten maǵan bergenińe ılandyr, sendir (shúkirge keltir)! Maǵan haqty haq retinde kórset jáne meni shabyttandyryp, onyń izimen júrýdi násip et! Jalǵandy jalǵan retinde kórset, oǵan boı aldyrýdan meni aýlaqtata gór! Nápsimdi alǵashqy materııanyń las sıpatynan arylt! Shúbá joq, Sen – Alǵashqy Sebepsiń!
Eı, ózińniń aǵylǵan nuryńnan (atqylaǵan aǵylýyńnan) jaratylǵan barlyq zattardyń Alǵashqy Sebebi!
Ortasynda jerler men teńizder ornalastyrylǵan jeti qat (qabat-qabat) kóktiń Rabbysy!
Kúnálarym úshin keshirim, kómek surap, Saǵan jalbarynamyn!
Kúnáhar ári boıkúıez qulyńnyń qateligin keshire gór!
Barlyǵynyń Rabbysy! Ózińnen aǵylǵan faıd arqyly dene-tánimdi dúnıelik lastan tazarta gór!
5) Eı, aspan jaratylystary men ǵarysh áleminiń, juldyzdardyń jáne kók júzindegi rýhtardyń Rabbysy! Qulyńnyń boıyn adamı qumarlyq-shahýat pen nápsiqumarlyq, baıansyz (azǵyn) dúnıege degen qushtarlyq-súıispenshilik basyp ketti! Ózińniń pák sıpatyńdy adasýdan qorǵanym et, taqýalyqty nysapsyzdyq pen túrli astamshylyqqa qarsy qalqanym qyl! Shúbá joq, Sen – barlyq nárseni (ilimińmen) qaramaǵyńda ustap, Qamtýshysyń!
6) Allam! Meni tórt tabıǵı sıpattyń (Elementtiń – jylylyq, sýyqtyq, ylǵaldylyq, qurǵaqtyq) tutqyn-quly bolýdan qutqar! Meni Ózińniń asa keń jaǵyńa – maqamyńa, asa ulyq quzyryńa – qasyńa (janyńa) al!
7) Eı, Allam! Kıfaıany (maǵan jeterlik molshylylyqty) meniń jáne topyraqtan jaralǵan deneler men bul álemniń arasyndaǵy áýreshil kúnáli baılanysty úzýge sebepshi qyl! Hıkmet-danalyqty nápsimniń ıláhı álemdermen, kók júzindegi aspan rýhtarymen birlikte bolýyna (jamanshylyqtan tıylýyna) sebepshi qyl!
Eı, Allam! Qasıetti rýh arqyly janyma tynyshtyq bere gór (nápsimdi rýhtandyr)! Aqylym men túısik-sezimime jetilgen (kemel) danalyq (hıkmet) arqyly áser et! Osy álemniń (tabıǵattyń) ornyna perishtelerdi serigim et!
9) Eı, Allam! Maǵan durys joldy kórsetip, týra jolǵa shabyttandyr! Imanymdy taqýalyqpen kúsheıt! Nápsimdi dúnıege degen mahabbattan alys et (dúnıeqońyzdyqty jırenishti kórset)!
10) Eı, Allam! Rýhymdy jalǵan dúnıe qumarlyqtaryna (dúnıáýı shahýattarǵa) qarsylyq jolynda tabandy qyl! Rýhyma perishteler mártebesin syılap, máńgilik jandar mekenine jetkize gór! Oǵan (rýhyma) joǵary jánnattan (jánnattyń tórinen) oryn berip, eń baǵaly, eń qasıetti jaýharlar jıyntyǵy qatarynan qyla gór!
11) Hal jáne sóz tilimen sóıleıtin barlyq bolmystardyń (máýjýdattardyń) aldynda turǵan Pák (Sýbhanaha) Allam! Ózińe madaq! Shúbá joq, Sen ol bolmystardan hıkmetke (danalyqqa) laıyqty árbir nárseni Berýshisiń jáne ol bolmystarǵa joq bolýmen salystyrǵanda bar bolýdy Nyǵmet ári rahym Etýshisiń! Bolmystar ishinde Seniń meıirimińe laıyqty sýbstantsııalar da, aktsıdentsııalar da bar, olar ıgilik-nyǵmetterińe shúkirlik etedi. «Ony páktep, maqtamaıtyn esh nárse joq. Biraq, sender olardyń táspıhtaryn (pákteýlerin) túsine almaısyńdar» (Isra súresi – 44).
12) Sýbhanaha Allahýma Taǵala! Saǵan madaq! Sen Ulysyń! Shúbá joq, «Ol týmady da, týylmady. Ári Oǵan eshkim de teń emes» (Yqylas súresi, 3-4). Bir (Jalǵyz), Ózgermeıtin Alla – sensiń!
13) Allam! Shúbá joq, Sen meniń nápsi-rýhymdy tórt Elementtiń (sý, aýa, topyraq, ot) qapasynda ustadyń (tutqyny ettiń) ári ony dúnıáýı shahýattardyń (qushtarlyqtyń) jyrtqysh ańdaryna berdiń (talattyń)!
14) Allam! Nápsime beıkúnáli sıpat bere gór (Rýhymdy tazalyqpen asqaqtat)! Ózińe laıyqty rahymdylyǵyńmen, Ózińe ǵana tán jomarttyǵyńmen rýhyma (janyma) aıaýshylyq ete gór! Rýhymdy qasıetti mekenine qaıtýǵa asyqtyryp, oǵan kók álemine qaıta oraltatyn kirshiksiz, kúnálardan taza táýbeni násip et! Nápsiniń qarańǵylyǵynan shyǵaratyn sanaly (áreketshil) aqylmen nurlandyr! Odan (rýhymnan) nadandyq pen adasýshylyqty alystat! Rýhymnyń qýatyn is-áreketimen kórset! Nápsimdi jahıldiktiń (nadandyqtyń) zulmatynan danalyqtyń nuryna, aqyldyń sáýlesine qaraı (bastaı) jeteleı gór! «Alla Taǵala – ıman keltirgenderdiń dosy. Olardy qarańǵylyqtardan jaryqqa shyǵarady» (Baqara súresi, 257).
15) Rýhym uıyqtaǵanda oǵan aqyrettegi jaqsy ómirdi (ǵaıyptaǵy salıh beınelerdi) kórsetip, súıinshile! Kómeski, shym-shytyryq tústerin qaıyrly istermen (jaqsylyqpen) jáne izgi aqıqat habarlarmen almastyr! Nápsime áser etetin dúnıáýı sezimder men elesterdiń kirinen (lastyqtan) tazalaı gór! Rýhymdy joǵary mártebeli álemge (máńgilik jandar álemine) kótere gór! Allam, meni durys jolǵa basta, molshylyqqa kenelt, pana bola gór!
16) Ýá, álhamdýlılláhı Allahýma ýahdahhý ýa salla Allahý ala mán lá nabıın baǵdahý ýa sálláma táslıman! (Madaq tek qana Allaǵa laıyq! Allanyń rızashylyq-meıirimi men sálemi ózinen keıin eshbir paıǵambar kelmeıtinge (hazireti paıǵambarǵa) bolsyn! (Ámın)!
Arab tilinen aýdaryp, jetkizgen – ál-Farabı atyndaǵy
Qazaq ulttyq ýnıversıtetiniń
shyǵystaný fakýltetiniń doktoranty
Aıdyngýl Havan (Alla razy bolsyn!)
