Abdýrahman ıbn Aýftyń taqýalyǵy
Birde Mádına qalasyna bir kisi kelip, Abdýrrahman ıbn Aýftyń úıin surastyrady. Adamdar onyń úıi Mádına qalasynan bes shaqyrym qashyqtyqta ornalasqan Jaraf eldi-mekeninde ekenin aıtty. Sol aımaqtaǵy jerdiń barlyǵy da Abdýrrahmannyń menshiginde bolatyn. Álgi adam Abdýrrahmannyń úıin qınalmaı taýyp aldy. Ol ústindegi shapanyn sheship tastap, qolyndaǵy kúrekpen jerden sý shyǵaryp, qudyq qazyp jatyr eken. Janyna kelip sálem berdi. Abdýrrahman onyń sálemine jaýap berdi. Sodan soń ol birneshe suraq qoıdy.
- Osy bizge kelgen Islam dini senderge de kelip, bizge túsken Quran senderge de túsken be? Bizdiń biletin nársemizdi sender de bilesińder me?
- Iá. Saǵan kelgen nárse bizge de kelgen. Sen biletin nárseni biz de bilemiz, - dedi Abdýrrahman.
- Onda nege biz dúnıeden bas tartamyz da, al sender dúnıege belsheden batyp ómir súresińder? Biz nege Alla jolyndaǵy jıhad dese, ornymyzdan ushyp turamyz da, al sender jer baýyrlap jatyp alasyńdar? Sender bul úmmettiń eń alǵashqy býyny jáne Paıǵambarymyzdyń (oǵan Allanyń salaýaty men sálemi bolsyn) kózin kórgen sahabalar emessińder me?
- Rasynda da solaı. Senderge kelgen nárse bizge de kelgen. Sender biletin nárseni biz de bilemiz. Biraq biz basymyzǵa qıyn zaman týǵanda sabyrlyq tanytqanymyzben, zaman túzelip qýanyshqa toly kúnderimiz kóbeıip, molshylyq ýaqyty kelgende sabyrlyq tanyta almaı qaldyq, - dedi Abdýrrahman ıbn Aýf.
Al, shyn máninde onyń osyǵan deıingi bar ómiri Alla jolynda mal men jandy qurban etýmen ótken edi. Abdýrrahman ıbn Aýf adal dos, keremet suhbattas edi. Birde ol bir top musylmandarmen dastarqandas boldy. Olardyń aldyna túrli taǵamdar qoıylyp, et pen nan toltyra salynǵan tabaqtar tartylyp jatty. Sonda Abdýrrahman aldyndaǵy dastarqanǵa qarap jylap jibergen eken. Janynda otyrǵandar sebebin suraǵanda ol: «Paıǵambarymyzdyń (oǵan Allanyń salaýaty men sálemi bolsyn) ózi de, onyń otbasy da arpadan jasalǵan nandy toıyp jeı almaı bul ómirden ótip ketti. Men keıde bizge aqyrette beriletin jaqsylyqtardyń bárin osy dúnıede jep taýysyp qoıdyq pa dep qorqamyn», – dep jaýap beripti.
"Jánnatpen súıinshilengen on sahaba" kitabynan
