Жұма намаздың алдындағы 4 ракағат намаз оқу сүннет па?
Ханафи мазһабы бойынша жұма парызынан алдын төрт ракағат намаз оқу - сүннет. Бұл жайында ғалымдарымыз өз еңбектерінде айтып кеткен. Мысалы “Мұхтар лил-Фәтуа” атты кітапта жұмадан алдын төрт ракағат және одан кейін төрт ракағат оқу сүннет екені айтылады[1]. Бұған жалпы және арнайы дәлелдер бар.
Жалпы дәлелге келетін болсақ, Айша анамыз былай деп баяндайды:
أنَّ النبيَّ صَلَّى اللهُ عليه وسلَّمَ كانَ لا يَدَعُ أرْبَعًا قَبْلَ الظُّهْرِ، ورَكْعَتَيْنِ قَبْلَ الغَدَاةِ
Алла елшісі (оған Алланың салауаты мен сәлемі болсын) Бесін намаз алдын төрт ракағат және таң намаздан алдын екі ракағат намазды қалдырмайтын.[2]
Жұма намазы бесін намазының орнына оқылған соң, жұма намазынан алдын да осы төрт ракағат сүннент екеніне нұсқайды.
Арнайы жұма намазға қатысты келісідей дәйектер бар.
Ибн Аббастан жеткен хадисте:
كان النبي يصلي قبل الجمعة أربعا لا يفصل في شيء منهن
Алла елшісі (оған Алланың салауаты мен сәлемі болсын) жұма намаздан алдын төрт ракағат оқып, арасын сәлеммен бөлмейтін[3].
Яғни оны екіге бөліп оқымай, бірден төрт ракағат оқып, соныңда бір сәлем беретін.
Әбу Әбдірахман Сәлами былай дейді:
عن أبي عبد الرحمن السلمي رضي الله عنه قال: كان عبد الله يأمرنا أن نصلي قبل الجمعة أربعا…
Абдулла ибн Масғұд (Алла одан разы болсын) бізге жұмадан алдын төрт ракағат намаз оқуды бұйыратын[4]...
Қорытынды: Жұма намаздан алдын төр ракағат намаз оқу - сүннет болып табылады. Бұл намаз бесін намаздағыдай екіге бөлінбей төрт ракағатты бірден оқылады.
Дарханұлы ТАМИРЛАН, Астана қаласының пәтуаға жауапты маманы
[1]Абдұлла ибн Махмуд әл-Маусили, “Мұхтар ли-л-фатуа” 38 бет.
[2] имам Бұхари және имам Муслим жеткізген хадис
[3] имам Табарани, “әл-Муғжаму-л-кабир” жеткізген хадис. Имам Таһанауи “Әсару-с-сунан” атты кітапта: “тізбегі хасан хадис” деп бағалады.
[4] имам Хаким <<Мастадрок>> атты хадис еңбегінде жеткізіп, оны сахих деп бағалаған. Сондай-ақ имам Тирмизи жеткізіп: хасан сахих хадис деп бағалайды.
