ҚҰДІРЕТ ШЕБЕРЛІГІ

Адаммен бірге періден біреуі, жыннан біреуі, шайтаннан біреуі, жұлдыздан біреуі, періштеден біреуі өкіл болып бұл дүниеге келеді. Құдайдың құдіретімен барлық алтауы бір сағатта туады. Бәрі бір адамның бойында жүреді.

Құданың құдіретінің шеберлігіне таң қаламын. Оның құдіретті қолымен жасаған шаһарды тамаша қылу үшін, соған бар жалған дүниенің жүзінде пенденің жасаған шаһарлары-соны да әлдеқандай тамаша көріп, пәлен-түген деп, сөйлеген болады.

Құдірет қолымен жасалған шаһар -адам болып жүреді, құс болып ұшады. Он сегіз мың ғаламда болған нәрсе бәрі бір өзінен табылады. Бір-біріне дұшпан үйірлігі жоқ төрт нәрсенің басын біріктіріп сонан жасады.

Тоғыз жолдың торабы, сегіз қиыр шартарап, төрт бұрышы түгел он түрлі қазына орнатып, төрт жүз қырық төрт жерден бекіту салып, үш жүз алпыс өзен ағызып, он екі жерден дарбаза орнатып, мешіт те өзінде, базар да өзінде, батыр да өзінде, көше -орамдар да өзінде өзінде, бау-бақша да өзінде, жерде не болса бәрі өзінде, көкте не болса бәрі өзінде, оты да өзінде, желі де өзінде, суы да өзінде, топырағы да өзінде, ол шаһарда бір тахыт жасап, ол тахытқа- бір патша, елі өзінің ішінен, шығарып қойды.

(Мәшһүрдің ғибрат сөздері)